राष्ट्रिय परिचयपत्र विवादः भ्याकेट निवेदनमा आज निवेदकका तर्फबाट बहस

१२ पुष, काठमाडौं । राष्ट्रिय परिचयपत्रसम्बन्धी विवादको भ्याकेट रिटमा आज निवेदकका तर्फबाट बहस राखिएको छ । भ्याकेट रिटमा सरकारका तर्फबाट बहस सकिएको छ । बिहीबारदेखि सर्वोच्च अदालतमा  सुरु भएको सुनुवाइ आज शुक्रवार पनि जारी छ । न्यायाधीशद्धय महेश शर्मा पौडेल र नित्यानन्द पाण्डेयको इजलासमा पेसी तोकिएको छ भने यो मुद्दा आज अन्तिम सुनुवाइ हुनेछ । 
 
बिहीबार सबै पक्षको बहस नसकिएपछि हेर्दाहेर्दै राखिएको थियो । आज बहसपछि निर्णय हुने अपेक्षा गरिएको छ ।  यसअघि दुवै पक्षको उपस्थित नभएपछि पेशीको जानकारी दिने आदेश सर्वोच्चले गरेको थियो । उक्त आदेशपछि रिट निवेदन र सरकार दुवैका कानुन व्यवसायी उपस्थित भएपछि सर्वोच्चले बिहीबारबाट सुनुवाइ थालेको थियो ।  

सरकारले कात्तिक २० गते भ्याकेटको निवेदन दर्ता गरेको थियो । अन्तरिम आदेश खारेज नहुँदा राष्ट्रिय परिचयपत्रसहित नागरिकको एकीकृत तथ्यांकमा समस्या भएको दाबी सरकारले गरेको थियो ।