जनकपुरमा एनपीएल विजेता जनकपुर बोल्ट्सलाई भव्य स्वागत, मधेसभर विजय उत्सवको तयारी

१२ पुस, काठमाडौं । नेपाल प्रिमियर लिग 'एनपीएल' को उपाधि विजेता टिम जनकपुर बोल्ट्सलाई मधेस प्रदेशको राजधानी जनकपुरधाममा भव्य स्वागत गरिएको छ। शुक्रबार जनकपुरको रजौलस्थित राम जानकी बहुउद्देश्यीय अन्तर्राष्ट्रिय रंगशालामा राष्ट्रिय क्रिकेट संघ, धनुषाले विशेष कार्यक्रम आयोजना गर्दै जनकपुर बोल्ट्सका खेलाडीहरूलाई सम्मान गरेको छ ।

कार्यक्रम अन्तर्गत रामजानकी रंगशालाबाट सुरु भएको ‘ट्रफी परेड’ जनकपुर बजार परिक्रमा गर्दै ऐतिहासिक रामजानकी मन्दिरसम्म पुग्यो। यस अवसरमा मधेस प्रदेशका मुख्यमन्त्री सतिश कुमार सिंह पनि खेलाडीहरूको गाडीमा सहभागी भएका थिए। नगर परिक्रमा दौरान हजारौं समर्थक उत्साहपूर्वक सहभागी भए। जनकपुरका चोकचोकमा खेलाडीहरूलाई स्थानीय बासिन्दा र क्रिकेटप्रेमीले भव्य स्वागत गरे।

धनुषा क्रिकेट संघका अध्यक्ष शोभाकान्त पाण्डेका अनुसार बिहीबार साँझ काठमाडौँबाट जनकपुर आइपुगेका जनकपुर बोल्ट्सका खेलाडीहरूलाई शुक्रबार आयोजित नगर परिक्रमा कार्यक्रमले अझ विशेष बनायो।

विजय उत्सवको सुरुवात जनकपुरबाट

नेपाल प्रिमियर लिग 'एनपीएल'को पहिलो संस्करणको विजेता बनेको जनकपुर बोल्ट्सले मधेस प्रदेशका सबै जिल्लाहरूमा विजय उत्सव मनाउने योजना बनाएको छ। गत शनिबार सम्पन्न फाइनल खेलमा सुदूरपश्चिम रोयल्सलाई पाँच विकेटले पराजित गर्दै उपाधि जितेको जनकपुर बोल्ट्सले विजय उत्सवको सुरुवात जनकपुरबाट गरेको हो।

जनकपुर बोल्ट्सका प्रबन्ध निर्देशक निरज खतिवडाले मधेस प्रदेशका आठवटै जिल्लामा विजय उत्सव मनाउने जानकारी दिए। उनका अनुसार जनकपुरपछि महोत्तरी, सर्लाही, रौतहट, बारा हुँदै पर्साको वीरगन्जमा ¥याली आयोजना गरिनेछ। वीरगन्जमा विजय उत्सव सम्पन्न गरेपछि टिम पूर्वका जिल्लाहरू सिरहा र सप्तरीमा पनि पुग्ने कार्यक्रम रहेको छ।

जनकपुर बोल्ट्सको विजयले सम्पूर्ण मधेस प्रदेशलाई गर्वको अनुभूति गराएको छ। आगामी दिनमा यस टिमले अझ उत्कृष्ट प्रदर्शन गर्दै राष्ट्रिय र अन्तर्राष्ट्रिय स्तरमा पहिचान बनाउने विश्वास गरिन्छ।