आर्थिक संकटमा हेटौंडा सिमेन्ट, असोज १५ देखि रोकिएको उत्पादन फेरी सुरु हुन सकेन्

१४ पुष, हेटौंडा । उपकरण बिग्रिएर थन्किएपछि उत्पादन बन्द भएको हेटौंडा सिमेन्ट उद्योग आर्थिक संकटमा परेको छ । आर्थिक समस्याका कारण गत असोज १५ गतेदेखि यस उद्योगको उत्पादन बन्द छ । राजनीतिक दलका कार्यकर्ता भर्ती गर्ने एउटा माध्याम बनेको यो उद्योग लामो समयदेखि आर्थिक रुपले संकटमा छ ।  

उत्पादन ठप्प भए पनि प्रशासनिक खर्च, कर्मचारीको तलबभत्ता, इन्धन खर्च बढिरहेको उद्योगको उच्च व्यवस्थापनले स्वीकार गरेको छ । आर्थिक संकटका कारण लामो समयदेखि बन्द रहेको उद्योगबाट उपकरण मर्मत हुनेबित्तिकै उत्पादन थाल्नेगरी तयारी भइरहेको उद्योग व्यवस्थापन समितिका अध्यक्ष नरेन्द्र भण्डारीले  बताए । 

उपकरण मर्मत गर्न भारतबाट प्राविधक ल्याउनुपर्ने भएकाले मर्मतमा समय लागेको हो । उद्योगसँग कच्चा पदार्थ पर्याप्त छ । हामीसँगै कच्चा पदार्थको अभाव छैन, अध्यक्ष भण्डारीले भने, उद्योगलाई चाहिने चार सय मेट्रिक टन कोइला मौज्दात छ । आर्थिक अभावका कारण यसअघि पनि दुई महिना उद्योग बन्द भएको थियो । गत भदौको तेस्रो सातादेखि उत्पादन सुरु गरेको  उद्योगले त्यस अवधिमा ६५ हजार बोरा सिमेन्ट उत्पादन गरेको थियो ।