अवकाशको सम्मुखमा एआईजीको लर्को, राज्यलाई अनावश्यक आर्थिक भार

१४ पुस, काठमाडौं । नेपाल प्रहरीमा दुई अतिरिक्त महानिरीक्षक (एआईजी)को दरबन्दी खाली हुँदैछ । एआईजीद्धय भरत बोहोरा पुस १४ र किरण बज्राचार्य पुस १६ गते अवकाशमा जाने भएपछि दुई एआईजीको दरबन्दी खाली हुने भएको हो  । दुवै जना ५६ वर्षे उमेरहदका कारण अवकाशमा जान लागेका हुन् ।

अब रिक्त हुने एआईजीका लागि प्रहरी नायब महानिरीक्षक (डीआईजी)हरु कुवेर कडायत, रविन्द्र केसी, चन्द्रकुवेर खापुङ, जनक भट्टराई र लालमणि आचार्य मुख्य प्रतिस्पर्धामा छन् । उनीहरु सबै एउटै लटमा बढुवा भएका हुन् । जसमा कडायत, केसी र भट्टराई प्रहरी महानिरीक्षक (आईजीपी) बसन्त बहादुर कुँवरका ब्याचमेट हुन् भने खापुङ र आचार्य हालका एआईजी दीपक थापाका ब्याची हुन् । त्यसैले सिनियर टोलीका ३ जनामध्ये बाटै एआईजी बढुवा सिफारिस गर्ने तयारी भएको छ  । प्रहरी महानिरीक्षक वसन्त कुँवरले आफ्ना व्याचीहरुलाई एआइजी बनाउने रणनीति लिएपछि कठायत,केसी र भट्टराई मध्ये दुईको सिफारिस गर्ने तयारी गरेका छन् ।

पछिल्लो केही महिना यता प्रहरीको बढुवामा एआईजीलाई मात्रै केन्द्रमा राखिएको भनेर तल्लो तहका अधिकृतहरू असन्तुष्ट बनेका छन् । तर गृह मन्त्रालय अहिले पनि एआईजी बढुवा निकालेपछि मात्र अन्य निकाल्ने तयारीमा छ । पछिल्लो एआईजी बढुवा हेर्दा आईजीपी कुँवरका ब्याचीहरुलाई प्राथमिकतामा राखिएको छ । जसकारण एआईजीको बढुवाको प्रबल दाबेदारहरु हुन्, कडायत, केसी र भट्टराई । तर, उनीहरुमध्ये एकजना भने बढुवामा छुट्नेछन् । एआईजीको दुई पद रिक्त तर, बढुवाका दाबेदारहरु तीन जना रहेकाले एकजना छुट्ने भएका हुन् ।

कात्तिक यता एआईजीका रिक्त तीन पदमा बढुवा गरिसक्दा पनि एसएसपीको बढुवामा गृह मन्त्रालयले चासो दिएको छैन । छोटो अवधिका लागि एआईजी बनाएर अवकाशमा पठाउने गरिएको छ । पछिल्लो पटक दुई प्रहरी नायब महानिरीक्षक (डीआईजी) लाई एआइजीमा बढुवा गर्ने निर्णय भयो। निर्णयअनुसार दुर्गासिंह चन्द र भरतबहादुर बोहरा एआईजीमा बढुवा भइसकेका छन । बोहरा यही पुस १४ गते अर्थात सोमबार अवकाशमा जाँदै छन् । त्यस्तै एआइजी किरण बज्राचार्य पनि उमेरहदका कारण यही पुस १६ मा अवकाशमा जाँदैछिन् ।

बोहरा र बज्राचार्यको स्थानमा बढुवाका लागि सिफारिसको तयारी हुँदैछ । तर पनि एसएसपी बढुवाका लागि गृह मन्त्रालयले चासो दिएको छैन। प्रहरी पछिल्लो पटक छोटो अवधिका लागि एआईजीमा बढुवा गर्दै अवकाशमा पठाउँदै गर्दा राज्यलाई आर्थिक दायित्व थपिएको छ । प्रहरीमा एआईजीबाट अवकाश हुने उमेरहद ५६ वर्ष तोकिएको छ । अवकाशको सम्मुखमा एआईजीमा बढुवा गर्ने क्रम अझै रोकिएको छैन । कुनै बेला नेपाल प्रहरीमा एआईजीको दरबन्दी १६ थियो । २०७४ कात्तिकमा एआईजीको दरबन्दी १६ पुर्याइएको थियो । अहिले एआईजीको दरबन्दी आठ छ ।

एक वर्षमा आठजना एआईजीमा बढुवा र अवकाशमा जाने अवस्था बनेको छ । प्रहरी महानिरीक्षक कुँवरका ब्याचीहरू तीन जनाबाहेक सबै एआइजी भएर बिदा हुँदैछन । यसै वर्ष मीरा चौधरी, श्यामलाल ज्ञवाली, रामदत्त जोशी, किरण राणा, केदार ढकाल, भीम ढकाल, उमेरहदका कारण एआईजीबाट अवकाशमा गइसकेका छन भने अबको दुई दिनमा थप दुई जना विदा हुँदैछन् ।