आइतबार दोहोरो अंकले घटेर २६०९ विन्दुमा रोकियो नेप्से, १५ करोडले बढ्यो कारोबार

१४ पुस, काठमाडौं । साताको पहिलो दिन आइतबार शेयरबजार २१.१२ अंक घटेको छ । आज नेप्से परिसूचक दोहोरो अंकले घटेको छ । नेप्से २१.१२ अंकले घटेर २६०९.५८ विन्दुमा बन्द भएको हो । यसदिन नेप्से परिसूचक घटे पनि कारोबार रकम भने बढेको छ । बिहीबार ५ अर्ब ३२ करोडको शेयर कारोबार भएकोमा आइतबार ५ अर्ब ४७ करोडको कारोबार भयो ।

अघिल्लो दिनको तुलनामा कारोबार रकममा १५ करोड रूपैयाँ वृद्धि भएको हो । कारोबार भइरहँदा बजार  २६४० अंकसम्म पुगे पनि अडिन सकेन । आज माइक्रोफाइनान्स समूह सबैभन्दा धेरै १.१२ प्रतिशत बढेको छ । त्यस्तै अन्य समूह ०.२९ प्रतिशत बढ्यो । फाइनान्स समूह सबैभन्दा धेरै ४.४७ प्रतिशत घट्यो । बैंकिङ ०.८७, विकास बैंक २.६५, हाइड्रोपावर १.७३, लगानी ०.६६, जीवन बीमा ०.३९, उत्पादन ०.८१, निर्जीवन बीमा ०.१२ तथा व्यापार समूह १.०३ प्रतिशत घटे ।

महिला लघुवित्त र आत्मनिर्भर लघुवित्तको मूल्य १० प्रतिशत बढ्यो । मानुषी लघुवित्तको ६.०९, सिर्जनशील लघुवित्तको ५.८९ तथा एनआरएन इन्फ्रास्ट्रक्चरको मूल्य ५.७ प्रतिशत बढ्यो । कारोबार रकमका आधारमा प्रभु बैंक, जानाकी फाइनान्स, एनआरएन इन्फ्रास्ट्रक्चर, एनएलजी इन्स्योरेन्स तथा रिभर फल्स पावर क्रमशः अगाडि रहे ।

५ कम्पनीको मूल्य १० प्रतिशत घटेको छ । सपोर्ट माइक्रोफाइनान्स, नारायणी डेभलपमेन्ट बैंक, सप्तकोशी विकास बैंक, जानाकी फाइनान्स र सिन्धु विकास बैंकको मूल्य १० प्रतिशत घट्यो । जोशी हाइड्रोपावरको ८.७, ग्रीन डेभलपमेन्टको ८.३ तथा बेस्ट फाइनान्सको मूल्य ७.१ प्रतिशत घट्यो । सर्वाधिक शेयर खरिद–बिक्री हुने दोस्रो कम्पनीमा जानकी फाइनान्स रहेको छ । उक्त कम्पनीको प्रतिकित्ता ८३३ रूपैयाँमा १६ करोड ९ लाख रूपैयाँ बराबरको शेयर कारोबार भएको छ ।