टोखामा एक दिने निःशुल्क दन्त स्वास्थ्य शिविर सम्पन्न

१४ पुस, काठमाडौं । काठमाडौंको टोखामा एक दिने निशुल्क दन्त स्वास्थ्य शिविर सम्पन्न भएको छ । शनिबार समृद्ध नारी मञ्चद्वारा आयोजित निःशुल्क दन्त स्वास्थ्य शिविरबाट २ सय भन्दा बढी व्यक्तिले स्वास्थ्यसेवा लिएका हुन् । 

टोखा नगरपालिका वार्ड नं ६ तथा समाज डेण्टलको सहयोगमा निःशुल्क दन्त स्वास्थ्य शिविरको आयोजना गरेको थियो। उक्त कार्यक्रमबाट आम नागरिकले निःशुल्क दन्त परीक्षण गरेको मञ्चकी संस्थापक अध्यक्ष विष्णु अर्यालले जानकारी दिइन् ।

दाँतको उपचार खर्चालु हुने तथा स्वास्थ्य दाँतको महत्व सर्वसाधारणमा थाहा नभएकोले पनि यस्ता कार्यक्रमहरू फलदायी हुने संस्थापक अध्यक्ष अर्यालले बताइन् । 

निःशुल्क दन्त स्वास्थ्य शिविरमा समाज डेण्टलका तर्फबाट स्वास्थ्य परीक्षण गर्नुका साथै अतिरिक्त सेवा लिएका ब्यक्तिहरुलाई निःशुल्क ब्रस, पेष्ट र गार्गल वितरण गरिएकाे थियाे।