प्रहरीका कार्यालय सहयोगी रुम्बाको हत्या आरोपमा गुप्तचरका इन्सपेक्टरसहित तीन जना पक्राउ

१४ पुस, काठमाडौं । बारामा नेपाल प्रहरीका कार्यालय सहयोगी राजकुमार रुम्बाको हत्यामा राष्ट्रिय अनुसन्धान विभागका एक जना कर्मचारीको संलग्नता देखिएको प्रहरीले जनाएको छ । बाराको जितपुर सिमरा उपमहानगरपालिका–११ मा गएको ६ पुसमा बागमती प्रदेश ०१ ०२८ च ७६१६ नम्बरको कारभित्र रुम्बा मृत भेटिएका थिए ।

प्रहरी कर्मचारीको हत्यामा संलग्न राष्ट्रिय अनुसन्धान विभाग (गुप्तचर)का इन्सपेक्टरसहित तीन जना पक्राउ परेका छन् । जितपुर सिमरा उपमहानगरपालिका–१ घर भएका राज कुमार रूम्बाको हत्या भएको घटनामा संलग्न रहेको अभियोगमा महोत्तरी जलेश्वर नगरपालिका–३ घर भई बारामा कार्यरुत गुप्तचरका इन्सपेक्टर श्रीकान्त तिवारीको पनि संलग्नता देखिएको प्रहरीले जनाएको छ । 

तिवारीसहित प्रहरीले जितपुर सिमरा उपमहानगरपालिका–१९ घर भएका २७ वर्षीय पुरूषोत्तम कुमार दास र २० वर्षीय ईन्द्रजित कुमार चौहानलाई पक्राउ गरी बारा प्रहरीले सार्वजनिक गरेको छ ।  जितपुर सिमरा उपमहानगरपालिका–११ स्थित बकुलिया देखी रमौली लोसन्डा जाने सडक छेउमा बागमती प्रदेश ०१–०२८ च ७६१६ नम्बरको कारमा राज कुमार पुस ६ गते बिहान मृत अवस्थामा फेला परेका थिए । सो कार गुप्तचरका इन्सपेक्टर तिवारीको हो । 

उनीहरुले कलैया जाने भनेर रुम्बालाई बोलाएको बाटोमा पिसाब फेर्न भनेर गाडी रोकी टाउकोमा गोली हानेर हत्या गरेको बाराका एसपी महेन्द्र खड्काले बताए । घटनापछि  रुम्बाको सुनको सिक्रि तथा झोला समेत दासले नै लिएर गएकोमा प्रहरीले सो बरामद गरेको छ ।  हत्याको कारण अझै प्रष्ट हुन नसकेको प्रहरीले जनाएको छ ।  

गुप्तचरका इन्सपेक्टरको हत्यामा कस्तो भूमिका थियो भन्नेबारे प्रहरीले केही बताएको छैन । एसपी खड्काका अनुसार मृतकका परिवारले उनीविरुद्ध पनि किटानी जाहेरी दिएका छन् । साथै, उनले के कारणले सो कार रुम्बालाई दिए भन्ने विषयमा थप अनुसन्धानका लागि उनलाई पनि नियन्त्रणमा राखिएको प्रहरीले जनाएको छ । पक्राउ परेकाउपर जिल्ला अदालत बाराबाट कर्तव्य ज्यान सम्बन्धी कसुरमा ७ दिन म्याद थप अनुमती लिई यस सम्बन्धमा प्रहरीले आवश्यक अनुसन्धान बढाइएको प्रहरीले जनाएको छ ।