कानून नमान्ने खेल संघलाई कारबाही हुन्छः खेलकुदमन्त्री चौधरी

१४ पुस, कास्की । युवा तथा खेलकुदमन्त्री तेजुलाल चौधरीले ऐन र कानुन नमान्ने खेल संघ तथा नेपाल ओलम्पिक कमिटीलाई कारबाही गरिने बताएका छन् । पोखरामा आज पत्रकारहरूसँगको कुराकानीमा मन्त्री चौधरीले सर्वोच्च अदालतको आदेश र सरकारको निर्देशन विपरीत कार्य गर्ने ओलम्पिक कमिटी र निर्वाचनमा सहभागी भएका राष्ट्रिय खेल संघमाथि कारबाही हुने बताए। 

“नेपाल ओलम्पिक कमिटी र खेल संघको गतिविधिलाई नेपाल सरकारले सहज रुपमा लिएको छैन । खेल संघलाई तीन दिनको समय दिएर स्पष्टीकरण सोधेका छौँ । जवाफ प्राप्त भएपछि कारबाही प्रक्रियाअघि बढाउँछौँ”, मन्त्री चौधरीले भने।

मन्त्री चौधरीले २७ खेल संघमध्ये २० वटाले ओलम्पिक कमिटीको निर्वाचनमा अनलाइनमार्फत भोटिङ गरेको र अदालत तथा सरकारको निर्देशन अवज्ञा गरेको बताए। नेपाल ओलम्पिक कमिटीको यही पुस १३ गतेका लागि तय भएको निर्वाचन कार्यक्रम रोक्न सर्वोच्च अदालतले पुस ११ गते अन्तरिम आदेश दिएको थियो । अदालतको आदेशपछि राष्ट्रिय खेलकुद परिषदले ओलम्पिक कमिटी र कमिटीसँग आबद्ध सम्पूर्ण खेल संघ तथा प्रतिनिधिलाई निर्वाचन नगर्नु र नगराउनु भन्ने निर्देशन जारी गरेको थियो । 

सर्वोच्च अदालतको आदेश र सरकारको निर्देशन विपरीत शनिबार निर्वाचन गरेर ओलम्पिक कमिटीले नेतृत्व चयन गरेको थियो । अनलाइन चुनावबाट जीवनराम श्रेष्ठ पुनः अध्यक्ष बनेको घोषणा गरिएको थियो । यसैबीच मन्त्री चौधरीले कर्णाली प्रदेशमा तय भएको १० औं राष्ट्रिय खेलकुद तोकिएको समयमा नै सम्पन्न गर्न सरकार प्रतिबद्ध रहेको बताए ।