नयाँ पार्टी खोल्न अन्य दलका असन्तुष्ट नेता खोजिरहेका छन भीम रावल, बुधबार घोषणा हुन सक्ने

१५ पुष, काठमाडौं । नेकपा एमालेबाट निस्कासन भएका भीम रावलले नयाँ पार्टी खोल्ने तयारी गरेका छन् । उनले नयाँ पार्टी बनाउन विभिन्न दलमा असन्तुष्ट भएर बसेका नेताहरु खोजिरहेका छन् । नेपाली कांग्रेस, नेकपा माओवादीसहित अन्य दलमा ठाउँ नपाएका र असन्तुष्ट बनेका नेतासँग उनको वार्ता चलिरहेको बताइएको छ । 
 
पार्टी खोल्ने र आगामी कार्य योजनाबारे जानकारी दिन रावलले बुधबार कार्की बैन्क्वेटमा पत्रकार सम्मेलन राखेका छन् । आफ्ना कुरा राख्न र भावी कार्ययोजना समेत जानकारी गराउन नेता रावलले पत्रकार सम्मेलन गर्न लागेको रावलका सहयोगी गोविन्द दुवालले जानकारी दिएका छन् । रावलले सम्भवत आगामी बुधबार नयाँ पार्टी घोषणा गर्नेछन् ।

रावललाई गत १० पुसमा एमालेले पार्टीको संगठित सदस्यबाट हटाउने निर्णय गरेको थियो । त्यसपछि पार्टी गठनको तयारीमा जुटेका रावलले राजनीतिक भेटवार्तालाई तीव्रता दिएका थिए ।  सोमबार बिहान मात्रै उनले नेपाली कांग्रेस (बीपी)का उपसभापति कर्ण मल्ल र सुदूरपश्चिम प्रदेश सभाका स्वतन्त्र सांसद डा. तारा जोशीसँग भेटवार्ता गरेका थिए । मल्ल बीपी कांग्रेसका हुन् भने जोशी नेकपा एकीकृत समाजवादीका पूर्वकेन्द्रीय सदस्य हुन् । 

२०७९ को निर्वाचनमा डडेल्धुरा प्रतिनिधिसभा अन्तर्गतको प्रदेश सभा २ बाट टिकट नपाएपछि उनी स्वतन्त्र उम्मेदवार बनेर सुदूरपश्चिम प्रदेश सभामा निर्वाचित भएका थिए । एमालेको कारबाहीपछि नयाँ पार्टी खोल्नेबारे रावलले आन्तरिक छलफल गरिरहेका छन् ।  बुधवार पत्रकार सम्मेलन गर्ने मोटामोटी तय भएको छ । उक्त पत्रकार सम्मेलनमा आफ्ना कुरा राख्ने र भावी कार्य योजनाका बारेमा समेत जानकारी दिने तयारी छ । 
 
एमालेमा झण्डै पाँच दशक सक्रिय रहेका रावललाई एमालेको बुधवार बसेको सचिवालय बैठकले पार्टी सदस्यता समेत नरहने गरी निष्कासन गरेको थियो ।  २०७८ सालमा चितवनमा भएको दशौँ महाधिवेशनमा अध्यक्षका लागि केपी शर्मा ओलीसँग प्रतिस्पर्धा गरेका रावल त्यसयता पार्टीमा निष्किृय जस्तै बनेका थिए ।