माधव नेपालसँग बामदेव गौतमले मागे कार्यकारी भूमिका, झलनाथपछिको वरियता

१५ पुष, काठमाडौं । नेकपा एकता राष्ट्रिय अभियानका संयोजक वामदेव गौतमले नेकपा एकीकृत समाजवादीमा कार्यकारी भूमिका पाउने पर्ने माग राखेका छन् । पार्टीलाई सक्रिय बनाउन आफ्ना पाँच प्रस्ताव पनि लागु हुनुपर्ने सर्त उनले राखेका छन् । एकीकृत समाजवादीका अध्यक्ष माधवकुमार नेपालसँग सोमबारको भेटमा उनले आफ्ना प्रस्ताव सर्त राखेका हुन् ।

अध्यक्ष नेपाललाई भेट्न आलोकनगर पुगेका गौतमले पुराना संस्मरणहरू पुनर्जीवित गर्ने गरी काम हुनुपर्ने बताएका छन् । अध्यक्ष नेपालसँगको भेटपछि गौतमले पुराना संस्मरणहरू पुनर्जीवित गरिएको र नयाँ आयामको सुरुवात हुन लागेको बताएका छन् । आफ्ना सर्त लागुभए एकीकृत समाजवादी प्रवेशको सम्भावना रहेको उनको भनाइ छ । 

आजको भेटमा पार्टी एकताको क्रममा आफूनिकट नेताहरूले कुन–कुन जिम्मेवारी पाउने भन्दै गौतमले चासो राखेका थिए । एकीकृत समाजवादीमा गौतमलाई नेपाल र झलनाथ खनालपछिको वरियता दिने तयारी छ । अन्य नेताहरूको व्यवस्थापनको टुंगो भने लागिसकेको छैन । गौतमले पार्टीलाई सक्रिय बनाउन आफ्नो क्रियाशील भूमिका पनि माग गरेका छन् । उनले आफ्नो मात्र नभएर आफूसँग भएका नेताहरूको उचित व्यवस्थापनको माग गरेका छन् ।
 
उनले वरिष्ठ नेताको सक्रिय भूमिका नहुने भन्दै आफूलाई २४ सै घण्टा केही न केही गर्ने भूमिका दिनुपर्ने माग गरेका छन् । कार्यक्षेत्रबिनाको नेता र केही नभएको कार्यक्षेत्र लिएर काम गर्न नसकिने उनको भनाइ छ । पार्टीलाई गति दिन केन्द्रीय कमिटी पूर्णकालीन हुनुपर्ने, जनतालाई गोलबन्द गर्न सक्ने विचार अघि सानुपर्ने, समाजवादलाई तात्कालिक विषय बनाएर देशका तीन क्षेत्रमा आमूल परिवर्तन गर्नुपर्ने उनको माग छ ।  
 
शासन प्रणाली र प्रत्यक्ष निर्वाचित राष्ट्रपति बटमलाई हुनुपर्ने गौतमको भनाइ छ । पूर्ण समानुपातिक निर्वाचन प्रणाली भए गतिशीलता पैदा हुने र नत्र समय मात्रै बर्बाद हुने उनको भनाइ छ । भेटमा माधव नेपालले पार्टीको विधानानुसार जिम्मेवारी हुने र बाँकी विषयमा छलफल गर्न सकिने बताएका थिए ।