वीरगन्जमा मालबाहक ट्रकबाट १६० केजी गाँजासहित दुई जना पक्राउ

१५ पुस, वीरगन्ज । प्रहरीको टोलीले वीरगन्जमा मालबाहक ट्रकबाट १६० केजी गाँजासहित दुई जनालाई पक्राउ गरेको छ। पक्राउ पर्नेमा ट्रकका धनी मकवानपुर, हेटौंडा उपमहानगरपालिका–७ कमाने निवासी ४४ वर्षीय कृष्ण घलान र चितवन, राप्ती नगरपालिका–३ झुरझेर निवासी २० वर्षीय राजाल विश्वकर्मा रहेका छन्।

आइतबार राति परवानीपुरबाट वीरगन्जको ड्राइपोर्टतर्फ आउँदै गरेको ना। ३ ख ४२१२ नम्बरको ट्रकलाई वीरगन्ज महानगरपालिका–१८ भवानीपुरमा रोकेर प्रहरीले चेकजाँच गरेको थियो। चेकजाँचका क्रममा ट्रकको हुटमा फल्स बटम बनाएर लुकाइएको अवस्थामा १६ वटा पोकामा राखिएको एक क्विन्टल ६० केजी गाँजा फेला परेको थियो।

प्रहरीले गाँजा बरामद गरेपछि ट्रकका चालक, गाडीधनी घलान र ट्रकमा सवार विश्वकर्मालाई नियन्त्रणमा लिएको छ। पक्राउ परेका तीनैजनामाथि लागुऔषध सम्बन्धी कसूरमा अनुसन्धान भइरहेको जिल्ला प्रहरी कार्यालयका प्रवक्ता प्रहरी नायब उपरीक्षक किशोर लम्सालले जानकारी दिएका छन्।

लम्सालका अनुसार गाँजा लुकाउन ट्रकको हुटमा विशेष गरी तयार गरिएको फल्स बटमको प्रयोग गरिएको थियो। यस घटनामा संलग्न अन्य व्यक्तिहरूको खोजी र अनुसन्धानसमेत जारी रहेको उनले बताए ।