लुम्बिनी प्रदेश अधिवेशन, प्रदेश प्रमुखले सच्याउन फिर्ता गरेको कर्मचारी विधेयक मुख्य एजेण्डा

१६ पुस, तुलसीपुर । लुम्बिनी प्रदेश सभाको बैठक आजदेखि सुरु हुँदैछ । प्रदेशसभाको पाँचौं अधिवेशन आह्वानका लागि प्रदेश प्रमुखसमक्ष सिफारिस गर्ने निर्णय गरिइएको थियो । प्रदेश सभाको पाँचौं अधिवेशनमा प्रदेश प्रमुखको कार्यालयबाट फिर्ता भएको कर्मचारी विधेयक प्रमुख एजेण्डाको रुपमा रहेको छ । प्रदेश सभाको पहिलो बैठक आज दिउँसो दुई बजे देउखुरीमा बस्दैछ ।

प्रदेश सभा सचिव दुर्लभकुमार पुनका अनुसार सभामुखले प्रदेश प्रमुखको कार्यालयबाट प्राप्त पत्रहरू पढेर सुनाउने र दलको तर्फबाट शुभकामना मन्तव्य राख्ने संभावित कार्यसूची छ । यसअघिको लुम्बिनी प्रदेश सभाको चौथो अधिवेशनबाट पारित भएर प्रदेश प्रमखुको कार्यालय बुटवलमा पठाइएका प्रदेश निजामति सेवा ऐन–२०८० लाई संशोधन गर्न बनेको विधेयक र स्थानीय निजामित सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक फिर्ता भएका थिए । 

प्रदेश प्रमुख कृष्णबहादुर घर्तीले सो विधेयकलाई नेपालको संविधानको धारा २०१ को उपधारा ३ बमोजिम पुनर्विचार गर्न आवश्यक देखिएको सन्देशसहित २०८१ असोज २२ गते प्रदेश सभा देउखुरीमा फिर्ता गरेका थिए । प्रदेश प्रमुख घर्तीले विधेयकमाथि धेरै कमजोरी भएकाले सच्याउन लिखित सन्देशसहित प्रदेश सभामा पठाएको र सच्याएर नआए प्रमाणीकरण नगर्ने बताउँदै आएका छन् । 

फिर्ता भएको कर्मचारी विधेयक भदौं ३१ गते प्रदेश सभाबाट पारित भएका थिए । प्रदेश प्रमुख घर्तीले प्रमाणीकरण नगरी फिर्ता पठाएपछि सरकार र प्रदेश सभाले असन्तुष्टि जनाउँदै आएका छन् । प्रदेश सभाका प्रवक्ता इश्वरी आचार्यले प्रदेश प्रमुखको कार्यालयबाट प्राप्त पत्रहरु पहिलो बैठकमा पढेर सुनाउने र दलको तर्फबाट प्रदेश सभा सदस्यले शुभकामना मन्तव्य राख्ने सम्भावित कार्यसूची रहेको बताए ।