नक्कली भूटानी शरणार्थी प्रकरणमा उच्च नेताहरूको नाम लिन दबाब दिने डीएसपीको किन भयो सरुवा ?

१६ पुस, काठमाडौं । नक्कली भुटानी शरणार्थी प्रकरणमा जेलमा रहेका केही व्यक्तिलाई बयानको क्रममा राजनीतिक दलका नेताहरूको नाम लिन दबाब दिएको भन्दै कारागार सुरक्षा लागि खटिएका डीएसपीलाई सरुवा गरिएको छ । जगन्नाथदेवलस्थित केन्द्रीय कारागारका डीएसपी जीवन निरौलाले बयानको क्रममा माथिल्लो तहका नेताहरूको नाम लिए तिमीहरू छुट्ने भन्दै दबाब दिएपछि उनी कारवाहीको लागि तानिएका हुन् ।

डीएसपी निरौलाले भूटानी शरणार्थी प्रकरणमा थुनिएका आरोपीहरुलाई उच्च अदालतमा बयान गर्दा राजनीति दलका नेताहरूको नाम लिनु भनेको थाह पाएपछि प्रहरी प्रधान कार्यालयले उनलाई कारवाही गर्ने देखिएको छ । निरौला र माओवादी र रवि लामिछानेको वकालतमा लाग्दै आएको पनि प्रहरी प्रधान कार्यालयका एक अधिकारीले भने ।

बेचन झालाई प्रतिवादी बनाएर दर्ता गरिएको मुद्दामा काठमाडौ जिल्ला अदालतमा प्रतिवादीहरूको बयान भइरहेको छ । शरणार्थी प्रकरणमा पुर्पक्षमा रहेका अधिकांश प्रतिवादी जगन्नाथ देवलमा थुनामा छन् । डीएसपी निरौलाले थुनामा भएकाहरूलाई बयान गर्दा ‘उच्च तहका अधिकारीको नाम लिनु’ भनेर दबाब दिएका थिए ।

शरणार्थीको मुद्दा चलखेल गरेको आरोपमा उनलाई रानीपोखरीस्थित उपत्यका प्रहरी कार्यालयमा सरुवा गरिएको छ । केन्द्रीय कारागारमा डीएसपी सुवास खड्कालाई पठाइएको छ । खड्का उपत्यका प्रहरी कार्यालयमा कार्यरत थिए । बेचन झा लाई प्रतिवादी बनाएर साउन ३० मा भुटानी शरणार्थी प्रकरणको पूरक अभियोग जिल्ला अदालत काठमाडौ+मा दर्ता गरिएको थियो ।

नेपालीलाई शरणार्थी बनाएर अमेरिका पठाउने नाममा ठगेको आरोपमा झाबाट २८ करोड ८१ लाख ७४ हजार रकम असुल गर्नुपर्ने सरकारी माग दावी छ । उनी विरुद्ध ठगी, लिखत किर्ते, राज्य विरुद्ध र सङ्गठित अपराधसम्बन्धी कसुर गरेको अभियोग छ । सोही प्रकरणमा बालकृष्ण खाँण पनि परेका थिए । टोपबहादुर रायमाझी अहिलेसम्म जेलमै रहेका छन् । रामबहादुर थापा बादलका छोरी प्रतीक थापा अझै जेलमा रहेका छन् ।

बेचनको बयानको आधारमा थुनामा भएका प्रतिवादीहरूलाई काठमाडौँ जिल्ला अदालतले थप बयान गराउन थालेको हो । यसैबिच, मङ्सिर १४ मा सरुवा भएका केन्द्रीय कारागारका जेलर कृष्णबहादुर कटुवालको सरुवा थमौती गरिएको छ । उनलाई गृह मन्त्रालयमा सरुवा गरेर अञ्जन न्यौपानेलाई पठाउने निर्णय भए पनि कटुवालको सरुवा रोकिएको छ । नक्कली भुटानी शरणार्थी प्रकरणमा आरोपीहरुको बयान चलिरहेकै कारण उनको सरुवा रोकिएको मन्त्रालय स्रोतले जनाएको छ ।

नक्कली भूटानी शरणार्थी प्रकरणमा पूर्व गृहमन्त्री बालकृष्ण खाण, पूर्व उपप्रधानमन्त्री टोपबहादुर रायमाझी, नेपाल सरकारका सचिव टेकनारायण पाण्डे लगायत ३० जना विरुद्ध मुद्दा दर्ता भएको छ ।  यस प्रकरणमा काठमाडौं प्रहरी परिसरमा थप १८ वटा उजुरी दर्ता भएका थिए ।