भीम रावलले खोल्ने दल पुरानो ब्राण्ड नहुने, ५० वर्षे कम्युनिष्ट राजनीतिलाई विश्राम दिने

१६ पुस, काठमाडौं । मुलुकका रातो झण्डा र कम्युनिष्ट नामधारी दलका पसलहरू धेरै भएको बेला नेकपा (एमाले) बाट निष्कासित नेता डा. भीम रावलले भने नयाँ पसलको ब्रान्डिङ गर्ने भएका छन् । कुनै कम्युनिष्ट नाम र सिद्धान्तको फ्रेन्चाईज नलिई नयाँ दल खोल्ने गृहकार्यमा भीम रावल लागेका हुन् ।

बुधबार पत्रकार सम्मेलनबाट पार्टीको कार्यक्रम र नीतिबारे जानकारी गराउने र देश दौडाहामा निस्किने तयारी गरिरहेका रावलले १० वर्षभित्र नयाँ दललाई मुलुकको पहिलो दल बनाउने गरी अभियान चाल्ने निकटवर्ती नेताहरूसँग बताउन थालेका छन् । देश दौडाहाबाट प्राप्त सल्लाह र सुझावका आधारमा पार्टी बनाउने तयारी रावलले बताए पनि यसको गृहकार्य निकै अगाडिबाट भएको हो । उनले आफ्नो जीवनकालको ५० वर्ष कम्युनिष्ट पार्टीमा विताए पनि अब यही महिनाबाट विश्राम दिदैछन् । कुनै बेला कम्युनिष्ट पार्टीको इतिहास लेखक समेत रहेका रावलले जीवनको उद्धार्धमा कम्युनिष्ट पार्टीभन्दा बाहिर रहने निश्चित जस्तै भएको छ ।

पार्टीको नाम भने कम्युनिष्टमा सीमित नगर्ने रावलको रणनीति छ । कम्युनिष्ट तथा गैरकम्युनिष्ट पार्टीका असन्तुष्ट नेताहरूलाई समेट्ने गरी पार्टीको नाम गैरकम्युनिष्ट हुने रावल निकटहरु दावी गर्छन । त्यसो त रावलले कम्युनिष्ट तथा गैरकम्युनिष्ट पार्टीका नेताहरूसँग संवाद अघि बढाइसकेका छन् । सोमबार मात्रै उनले नेपाली कांग्रेस बीपीका उपसभापति कर्ण मल्ल र नेकपा (एकीकृत समाजवादी) का पूर्वकेन्द्रीय सदस्य तथा सुदूरपश्चिम प्रदेशका सांसद तारा जोशीसँग संवाद गरेका थिए ।

बुधबार पत्रकार सम्मेलन गरेपछि जनआवाज सुन्न देशभर हिँड्ने र त्यहाँबाट प्राप्त सल्लाह र सुझावलाई समेट्दै पार्टी निर्माणमा जुट्ने तयारी रावलको रहेको छ । अहिलेका लागि अभियान भनेर देश दौडाहामा निस्किने तयारी रावलको छ । उक्त अभियानमा जतिसक्दो नेताहरू जोड्ने तयारी रहेको नेताहरूले बताएका छन् । त्यसअनुसार पार्टी घोषणा गर्ने रावलको तयारी छ ।

लामो समय एमाले अध्यक्ष केपी  ओलीसँग अन्तरसंघर्ष गरेका रावल अघिल्लो साताबाट एमालेले निष्काषण गरेपछि कम्युनिष्ट सिद्धान्तबाटै अलग भएका छन् । एमालेले साधारण सदस्यबाट समेत निकालेपछि रावल विकल्पमा नयाँ पार्टी खोल्ने तयारीमा जुटेका हुन् । रावलनिकट नेता र उनीसँग छलफलमा रहेका नेताहरूको भनाइमा गैरकम्युनिस्ट  पार्टी खोल्ने रावलको तयारी छ । जीवनका झन्डै ६९ वसन्त पारेका रावल  कम्युनिस्ट राजनीतिमा थिए ।

एमालेको कारबाहीपछि रावल कम्युनिस्ट राजनीतिबाट विरक्तिएको  देखिन्छ । यद्यपि, जीवनभर कम्युनिस्ट राजनीतिक गरेका रावलले खोल्ने पार्टी कुन राजनीतिक सिद्धान्तको होला भन्ने चाहिँ चासो छ । रावल २०३० सालबाट प्रगतिशील विद्यार्थी राजनीतिमा जोडिएका थिए ।  रावलले २०४८ सालको आमनिर्वाचनमा अछाममा टिकट पाए तर हारे । २०५१ सालमा दोस्रोपटक भीम रावलले नै टिकट पाए र जिते । पहिलोपटक निर्वाचन जितेका रावल एमाले अध्यक्ष मनमोहन अधिकारी प्रधानमन्त्री बन्दा नागरिक उड्डयन तथा पर्यटन राज्यमन्त्री भए । २०५४ सालमा एमालेको नेपालगन्जमा भएको छटौँ महाधिवेशनबाट रावल केन्द्रीय सदस्य बने ।

तत्कालीन एमाले वरिष्ठ नेता माधवकुमार नेपालको नेतृत्वको सरकारमा रावल गृहमन्त्री बनेका थिए । एमालेको नवौँ महाधिवेशनबाट उपाध्यक्षमा निर्वाचित भएका थिए । एघारौँ महाधिवेशनमा अध्यक्ष ओलीविरुद्ध उम्मेदवारी दिएका थिए । ओलीले जिते उनले हारे ।