नेपाल प्रहरीका दुई डीआइजी एआइजी बढुवामा सिफारिस

१८ पुस, काठमाडौं । नेपाल प्रहरीका दुई प्रहरी नायब महानिरीक्षक (डीआईजी)लाई अतिरिक्त प्रहरी महानिरीक्षक (एआईजी)मा बढुवा सिफारिस गरिएको छ। गृह मन्त्रालय बढुवा समिति सचिवालयले बुधबार राति डीआईजीद्वय कुवेर कडायत र रविन्द्र केसीलाई एआईजीमा बढुवा गर्न सिफारिस गरेको हो।

हालसालै एआईजीद्वय भरतबहादुर बोहरा र किरण बज्राचार्यले अवकाश पाएपछि उक्त रिक्त दरबन्दीमा एआईजी बढुवा गरिएको बढुवा समिति सचिवालयले जनाएको छ। कडायत प्रहरी महानिरीक्षकको सचिवालयमा कार्यरत थिए भने केसी केसी अन्वेषण योजना तथा विकास निर्देशनालयमा कार्यरत थिए। यो बढुवामा डीआईजी जनक भट्टराई छुटेका छन्। उनी अब डीआईजीबाटै अवकाशमा जाने भएका छन्। 

आफ्ना निकट ब्याचमेट सबैलाई भाग पुर्‍याउने योजनाअनुसार प्रहरी महानिरीक्षक वसन्तबहादुर कुँवरले अहिले एआईजीहरुको बढुवा गरिरहेका थिए। कुँवरसँग निकट रहेका कारण कडायतले बढुवा पाए। गृहमन्त्री रमेश लेखकसँग नजिक भएकाले केसीले बढुवा पाए भने भट्टराई शक्तिकेन्द्रको रोजाइमा परेनन्।