एसएसपी बढुवाका लागि चरम राजनीतिक लविङ

१८ पुस, काठमाडौं । एआईजीको लर्को लगाएर राज्यलाई आर्थिक भार पारिरहेको सरकारले एसएसपी, एसपी, डीएसपीको बढुवामा भने चरम राजनीति गरिरहेको छ ।  

नेपाल प्रहरीका प्रहरी उपरीक्षक (एसपी)हरूको प्रहरी वरिष्ठ उपरीक्षक (एसएसपी)मा बढुवा हुन लागेका बेला २०५८ सालमा प्रहरी निरीक्षकमा भर्ना भएका ११४ टोलीबाट सबैलाई मिसाएर बढुवा गर्न खोज्दा राजनीति घुसेको हो । ११४ टोलीबाट डीएसपी रमेश थापासहितका १०÷१२ जना २०७५ को अन्तिममा एसपीमा बढुवा भएका थिए । सोही बेला असईबाट आएकाहरू पनि एसपीमा सँगै बढुवा भएका थिए ।

उनीहरुलाई मिसाएर बढुवा गर्न खोजिएको छ । ११४ टोलीबाटै २०७६ को अन्तिममा वेद विष्टसहितका डीएसपीहरूको एसपीमा बढुवा भएको थियो । २३  एसएसपीको पद रिक्त भैसक्दा पनि कस–कसलाई बढुवाको सुचीमा राख्ने हो भन्ने गृहमन्त्रालयमा राजनीतिक लविङ चलिहरेको छ । असईबाट आएका र माओवादी भनिएर चिनिएका एसपीहरू आफू सुरक्षित हुन ०७५ मा बढुवा भएकालाई मात्रै एसएसपीमा बढुवा गर्नुपर्ने लबिङमा लागेका छन् । ०७६ मा बुढवा भएका एसपीहरूले ११४औँ टोलीका फ्रेस एसपीहरूलाई पनि मिसाएर एसएसपीमा बढुवा गर्नुपर्ने अडानमा छन् । आईजीपी कुँवर पनि ११४औँ टोलीमा फ्रेस प्रहरी निरीक्षकमा भर्ना भएका एसपीहरूलाई नै एसएसपीमा बढुवा गरेर अगाडि बढाउने पक्षमा रहेको स्रोतको दावी छ ।

०७५ मा असईबाट आएकालाई भ्रष्ट र खराब आचरणका एसपीलाई रोकेर ०७६ का एसपीलाई एकसाथ बढुवा गर्नुपर्ने दवाव रहेको पनि स्रोतको दावी छ । ०७५ मा बढुवा भएका एसपीहरू रमेश थापा, कृष्ण कोइराला, अनुपमशम्शेर जबरा, जनार्दन जिसी राम्रा एसपी मानिन्छन् । अब एसएसपीमा बढुवा रमेश थापा आईजीपी बन्ने दौडमा एक नम्बरमै हुनेछन् । ०७५ कै व्याचमा असईबाट आएका भ्रष्ट र विवादित छवि बनाएका एसपीहरू पनि छन् । ती विवादित र भ्रष्ट छवि बनाएका एसपीहरू एसएसपी बढुवामा पर्न न्वारनदेखिको बल लगाइरहेका छन् ।

तत्कालीन समयमा गृहमन्त्री रामबहादुर थापाका छोरा प्रतीक थापाको चाकडी र शुभलाभ गरेर आएका एसपीहरू पनि एसएसपी बन्न जोडबल गरिरहेका छन् । असईबाट आएका एसपी सन्तोष खड्का अलि प्रभावशाली रहेका छन् । कारवाहीको सिफारिस भएका तर शक्तिकेन्द्रको आडमा जोगिएका एसपी प्रकाश रानाभाट पनि आफ्नो थप शक्ति देखाउन लागिपरेका छन् । एसपी नवराज अधिकारी पनि बढुवाको लाइनमा रहेका छन् । एसपीहरू वेद विष्ट, शिवकुमार श्रेष्ठ, प्रकाश मल्ल, दयानिधि ज्ञवाली, सन्तोष भट्टराई, प्रभु ढकाल, राजेन्द्रप्रसाद धमला लगायतले आफू बढुवा हुनुपर्ने भन्दै दौडधुप गरिरहेका छन् ।