राज्य व्यवस्था समितिबाट पारित भयो भ्रष्टाचार निवारण ऐन संशोधन विधेयक

१७ पुस, काठमाडौं । मन्त्रिपरिषदका नीतिगत निर्णय अख्तियारलाई हेर्न दिने कि नदिने भन्ने विषयमा लामो समय अलमलमा रहेको भ्रष्टाचार निवारण ऐन संशोधन विधेयक संसदीय समितिबाट पारित भएको छ । राज्य व्यवस्था समितिमा सभापति रामहरी खतिवडाले उक्त विधेयकको संशोधन प्रस्ताव पास गर्न प्रस्तुत गरेपछि सर्वसम्मतीबाट विधेयक पारित गरिएको हो ।

संशोधन विधेयकमाथि छलफल गर्न नेपाली कांग्रेसका सांसद हृदयराम थानी नेतृत्वमा उपसमिति पनि बनेको थियो । सो समितिले विधेयक अध्ययन गरी सुझावसहित समितिमा बुझाएको थियो । यसपछि बिहीबार बसेको  समितिको बैठकले उपसमितिले अध्ययनपछि बुझाएको भ्रष्टाचार निवारण ऐन–२०५९ लाई संशोधन गर्न बनेको विधेयक पारित भएको हो । अब संसदको अधिवेशनमा प्रस्तुत गरिनेछ ।