अध्यक्ष प्रचण्डले उपराष्ट्रपति भइसकेका नन्दबहादुर पुनलाई किन बनाउँदैछन् आफ्नो उत्तराधिकारी ?

१८ पुष, काठमाडौं । लामो समयदेखि पार्टीको नेतृत्वमा रहेका अध्यक्ष पुष्पकमल दाहाल प्रचण्डले पुर्वउपराष्ट्रपति भइसकेका नन्दबहादुर पुनलाई सक्रिय राजनीतिमा ल्याएर आफ्नो उत्तराधिकारी बनाउन चाहेको विषयले यतिबेला नेकपा माओवादीमा तरंग छ । प्रचण्डकै सल्लाहमा पुन पार्टीका बैठकहरूमा पनि सहभागी भइरहेका छन् । बिहीबारको स्थायी कमिटी बैठकमा सहभागी भएको पुनको तस्वीर माओवादीकै नेताहरूले सार्वजनिक गरे ।  

पुन यसअघिका बैठकमा पनि सहभागी थिए । तर, बिहीबार केन्द्रीय कार्यालय पेरिसडाँडामा बसेको स्थायी कमिटी बैठकमा पुन सहभागी भएको तस्वीर हालेर दुई कार्यकाल उपराष्ट्रपति भएका पुनलाई प्रचण्डले  पार्टी राजनीतिमा फर्काउन चाहेको एक थरी नेताले पुष्टि गरे । तत्काल सम्भव नभएपनि माओवादीभित्र प्रचण्डको विकल्पमा आउने सक्ने नेताको खोजी भने सुरु भइसकेको थियो । प्रचण्डले पनि उपयुक्त व्यक्ति तयार भएमा आफू नेतृत्वमा बसिनरहने संकेत पनि गरेका थिए । पुन प्रचण्डका पुराना विश्वास पात्र हुन् । उनी उपराष्ट्रपति भएपछि वर्षमान पुनलाई प्रचण्डले काखी च्यापेका थिए ।  

पूर्वकमाण्डर जनार्दन शर्मा र प्रचण्डबीच राम्रो सम्बन्ध छैन् । नन्दबहादुर आउँदा वर्षमान पुनलाई आफ्नो भविष्यप्रति चिन्ता देखाउनुपर्ने अवस्था सिर्जना भएको छ । युद्धकालमा दुवै पुन विद्रोही सेनाका कमान्डर थिए । प्रचण्डको इच्छा नै माओवादीमा सर्वैसर्वा भएपनि नन्दकिशोर पुनलाई विशेष जिम्मेवारी दिने विषयमा माओवादीभित्र मतभेद रहेको छ । माओवादीका केही नेताहरू पुनलाई माओवादीको उपाध्यक्ष बनाउन तयार देखिएका छैनन् । तर, अध्यक्ष प्रचण्डको चाहनाअनुसार पार्टीले भूमिका दिन खोजेपछि उनीहरू विद्रोह गर्ने स्थितिमा पनि देखिएका छैनन् । 

हाल २१ सदस्यीय माओवादी केन्द्रको पदाधिकारीमा वरिष्ठ उपाध्यक्ष नारायणकाजी श्रेष्ठ छन् भने उपाध्यक्षमा कृष्णबहादुर महरा, अग्नि सापकोटा र पम्फा भुसाल । यी तीन नेता माओवादीमा आफ्नो उत्तराधिकारी भएर आउने कुरामा प्रचण्ड मात्र हैन अरु नेताले पनि विश्वास गर्दैनन् । महासचिवमा देव गुरुङ छन् भने उपमहासचिवमा वर्षमान पुन, जनार्दन शर्मा, गिरिराजमणि पोखरेल, शक्ति बस्नेत, मात्रिका यादव र हरिबोल गजुरेल छन् । यो लहरमा पनि उपयुक्त उत्तराधिकारी नदेखेपछि प्रचण्डले पुनलाई पार्टी राजनीतिमा फर्काएर जिम्मेवारी दिन चाहेको देखिन्छ । 

९ जना सचिवमा दिनानाथ शर्मा, चक्रपाणि खनाल, देवेन्द्र पौडेल, लिलामणि पोखरेल, गणेश शाह, हितमान शाक्य, हितराज पाण्डे, डिलाराम आचार्य र राम कार्की रहेका छन् भने कोषाध्यक्षमा श्रीराम ढकाल छन् । अब नन्दकिशोर र अमिक शेरचन दुवै जना थपिएमा माओवादीको पदाधिकारी संख्या २३ सदस्यीय हुनेछ । माओवादीको तल्लो तहमा भने उपराष्ट्रपतिको जिम्मेवारीमा रहेको र उमेरका कारणले समेत राजनीतिबाट रिटायर्ड हुनुपर्ने अवस्थामा पुगेका नेताहरूलाई पदाधिकारीमा ल्याउनु स्वभाविक नरहेको मत भएको देखिन्छ ।

पुन र शेरचनलाई उपाध्यक्ष बनाउन विधान संशोधनको विकल्पबारे पनि माओवादी पदाधिकारीले गृहकार्य गरेका छन् । माओवादी एक पदाधिकारी भन्छन्, पदाधिकारी थप भएको विषयमा अर्को महाधिवेशनमा छलफल हुनेगरी जान सकिने व्यवस्था विधानतः रहेकाले अप्ठ्यारो पर्दैन । राजनीतिक वृत्तमा चर्चा के छ भने पुनलाई प्रचण्डले पार्टी उपाध्यक्षको आश्वासन दिएर बैठकमा बोलाउने गरेका हुन् । किन भने पुन प्रचण्डका सदाबहार सारथि हुन् । जनयुद्धदेखि शान्ति प्रक्रियापछिसम्म पुन प्रचण्डकै सहयोगी थिए । 

अहिले पुनलाई सक्रिय राजनीतिमा ल्याएर पार्टीमा आफूपछिको जिम्मेवारी दिँदा पछि पार्टीमा केही समस्या आइहाले उनलाई अघिसार्न मिल्ने र राजनीतिक दलमा वार्गेनिङ गर्ने अवस्थामा आफ्नो हात माथिपर्ने अवस्था आए पुनलाई राष्ट्रपतिको उम्मेदवार पनि बनाउन सकिने सोचमा प्रचण्ड छन् । पुन आफूलाई हरदम साथ दिने नेता भएकाले पनि उनी सक्रिय राजनीतिमा फर्किंदा पार्टीभित्र आफूलाई सहज हुने प्रचण्डको बुझाइ छ । माओवादीभित्र अहिले प्रचण्डको उत्तराधिकारी को भन्ने विषयमा विवाद छ । यो विवादको खाली ठाउँ पुर्ने उपयुक्त पात्र पुन नै भएको प्रचण्डले ठानेका छन् । प्रचण्डको यो तयारीप्रति शर्मा र अर्का पुन भने असन्तुष्ट रहेको जनाइएको छ ।