ओलीको राजनीतिक प्रतिवेदनः कांग्रेस-एमाले सत्ता सहकार्यमा कोर्स करेक्सन कि समीक्षा मात्रै ?

१८ पुष, काठमाडौं ।  सत्तारुढ दल नेकपा एमालेका अध्यक्ष एवं प्रधानमन्त्री केपी शर्मा ओलीले कांग्रेससँग सत्ता गठबन्धन गरेपछि सुरु भएको राजनीतिक कोर्सको समीक्षा गर्ने गरी प्रतिवेदन बनाएका छन् । केन्द्रीय सचिवालको बिहीबारको बैठकले पुस २१ देखि हुने केन्द्रीय कमिटी बैठकमा प्रस्तुत गर्ने राजनीतिक प्रस्ताव पारित भएको छ । यसमा कांग्रेस–एमाले गठबन्धनपछि सुरु भएको राजनीतिको समीक्षा गरिएको छ । 

बिहीबार पार्टी केन्द्रीय कार्यालयमा बसेको सचिवालय बैठकका निर्णय सुनाउँदै उपमहासचिव प्रदीप ज्ञवालीले पुस २१ र २२ गते बस्ने केन्द्रीय कमिटीका निम्ति तयार गरिएको राजनीतिक प्रतिवेदन प्रस्तुत गर्ने निर्णय गरेको बताए । उनले राजनीतिक प्रतिवेदनका मुख्यमुख्य विषयमा छलफल पनि भएको जानकारी दिए । प्रतिवेदनमा पछिल्लो राजनीतिक अवस्थाको विवेचना गरिएको उनको भनाइ छ ।

एमाले र कांग्रेसबीचको सत्ता सहकार्यको औचित्य, आवश्यकता र त्यसले सिर्जना गरेका अवसरहरूका बारेमा प्रतिवेदनमा चर्चा गरिएको उनले बताए । अध्यक्ष एवं प्रधानमन्त्री ओलीले केन्द्रीय कमिटी बैठकमा प्रतिवेदन प्रस्तुत गर्ने छन् । उपमहासचिव प्रदीप ज्ञवालीले राजनीतिक प्रतिवेदनलाई केन्द्रीय कमिटीमा प्रस्तुत गर्ने निर्णय गरेको बताए ।

उनले सरकारका कामलाई प्रभावकारी बनाउन सुझाव दिनुका साथै ०८४ मा एमालेलाई बलियो राष्ट्रिय शक्ति निर्माणका लागि कार्यायोजना बनाउने बताए । नयाँ राजनीतिक कोर्स सुरु भएपछिको राजनीतिक परिस्थितिको विश्लेषण र राष्ट्रिय शक्ति निर्माण गर्ने मुख्य निर्णय हुने उनले जानकारी दिए ।