मन्त्रालयमा जिल्ला सुरक्षा समितिको भर्जुअल बैठक राखेर गृहमन्त्रीले भने, परिणाममुखी काम देखिएन

१९ पुष, काठमाडौं । गृहमन्त्री रमेश लेखकले शुक्रबार गृह मन्त्रालयमा जिल्ला सुरक्षा समितिको भर्चुअल बैठक राखेर परिणाममुखी काम नभएको बताएका छन् । उनले सुरक्षा अधिकारीहरुलाई सिमित स्रोत र साधनबाट परिणाममुखी काम निकाल्न निर्देशन दिएका छन् । मुलुकभरका प्रमुख जिल्ला अधिकारी र सुरक्षा प्रमुखलाई उनले यस्तो निर्देशन दिएका हुन् । 

बैठकमा लेखकले लागुऔषध नियन्त्रण, आत्महत्या न्यूनीकरण तथा सवारी दुर्घटना न्युनीकरण चुनौतीका रुपमा थपिएर आएको बताए । अहिले चुनौतीका रुपमा देखा परेका तीनवटै विषय एक–अर्कासित सम्बन्धित छन्, त्यसको न्यूनीकरणका लागि प्रदेश र स्थानीय तहसित पनि समन्वय गर्न आवश्यक छ । सीमामा हुने अपराध, चोरीशिकारी नियन्त्रण, भ्रष्टाचार न्युनीकरण र आर्थिक अनियमिततामा बढी ध्इान दिनुस, उनले भने । 

सार्वजनिक सम्पतीको संरक्षण र अतिक्रमण हटाउने विषयमा पनि जोड दिएर लाग्नपर्ने उनले बताए । भर्चुअल बैठकमा सुरक्षा निकायका प्रमुख, गृहमन्त्रालयको विभिन्न महाशाखाका प्रमुख र देशभरका प्रमुख जिल्ला अधिकारीसहित जिल्ला सुरक्षा समितिका पदाधिकारीहरू सहभागी थिए । मन्त्रालयले कानुनी, नीतिगत र संरचनात्मक सुधारका कामहरू अगाडि बढाएको मन्त्री लेखकको दावी थियो । 

उनले सोही अनुसार कामको गुणस्तर बढाएर जानुपर्ने र शान्ति सुरक्षाको गम्भीर जिम्मेवारी बहन गर्नुपर्ने बताए । बैठकमा गृहसचिब गोकर्णमणि दुवाडीले नतिजा देखिनेगरी काम गर्न निर्देशन दिए । उनले सेवाप्रवाह प्रभावकारी बनाउन जोड दिँदै गुनासोरहित सेवाप्रवाहमा ध्यान दिन र विपद् व्यवस्थापनका लागि पूर्वतयारी गर्न आवश्यक रहेको बताए ।