१८ जना उपसचिवले सहसचिवमा र ५७ शाखा अधिकृतले पाए उपसचिवमा बढुवा हुने अवसर

१९ पुष, काठमाडौं । सरकारले १८ जनालाई सहसचिवमा बढुवाका लागि सिफारिस गरेको छ । संघीय मामिला तथा सामान्य प्रशासन मन्त्रालयको बढुवा समितिको सचिवालयले १८ जनालाई सहसचिवमा बढुवा गर्न सिफारिस गरेको हो । यस्तै ५७ जना शाखा अधिकृतको उपसचिवमा बढुवा सिफारिस भएको छ । कार्यसम्पादन मूल्यांकनका आधारमा संघीय मामिला तथा सामान्य प्रशासन मन्त्रालयले बढुवाका लागि शुक्रबार सूचना निकालेको छ ।

सचिवालयले बढुवा समितिको पुस १९ को निर्णयअनुसार प्रशासन सेवाका उपसचिवलाई कार्यक्षमताको मूल्यांकनबाट बढुवा सिफारिस गरेको जनाएको छ । उपसचिवबाट सहसचिवमा बढुवा सिफारिस हुने पहिलो नम्बरमा प्रेमप्रसाद लुइँटेल, दोस्रो नम्बरमा रामदत्त पाण्डेय, तेस्रो नम्बरमा लक्ष्मण ढकाल, चौथो नम्बरमा विनीता भट्टराई र पाँचौ नम्बरमा दिलकुमार तामाङ रहेका छन् । 

लक्ष्मी पाण्डेय, मनिता श्रेष्ठ, लोकबहादुर सुनार र जगदीश्वर उपाध्याय पनि बढुवा सिफारिसमा परेका छन् । नारद गौतम, निर्मल ढकाल, वीरेन्द्रकुमार मिश्र, राजेन्द्रकुमार हमाल, इन्द्रप्रसाद बस्याल, शिवप्रसाद चौधरी, दिव्यराज पोखरेल, पूर्णमान श्रेष्ठ र कृष्णबहादुर शाही बढुवा सिफारिस सूचीमा छन् । बढुवा समितिले कार्यक्षमताको मूल्यांकनबाट सिफारिस गरेका १८ जना उपसचिवलाई नै शतप्रतिशत अर्थात १०० अंक दिएको छ ।