स्वर्णलक्ष्मी सहकारी ठगीः फिक्कल गाउँपालिका उपाध्यक्ष बरालविरुद्ध पनि मुद्दा दायर

२१ पुस, काठमाडौं। सिन्धुलीको फिक्कल गाउँपालिकाका उपाध्यक्ष राजु बरालविरुद्ध सहकारी ठगी प्रकरणमा मुद्दा दायर भएको छ ।  जिल्ला सरकारी वकिल कार्यालय काठमाडौंले कालिमाटिस्थित स्वर्णलक्ष्मी सहकारी ठगीमा आइतबार काठमाडौं जिल्ला अदालतमा मुद्दा दायर गरेको हो । उनलाई प्रहरीले पक्राउ नगरी फरार प्रतिवादी बनाएर मुद्दा दायर गरेको छ । बराल स्वर्णलक्ष्मी सहकारीका सञ्चालक समिति सदस्य समेत हुन् ।  

उनीसहित यो सहकारीमा ३९ जनालाई प्रतिवादीलाई बनाउँदै सहकारी ठगी र संगठित अपराधको कसुरमा मुद्दा दायर गरिएको छ । उनीहरुविरुद्ध १ अर्ब १९ करोड ३० लाख ९० हजार ४९३ रुपैयाँ बिगो मागदाबी गरिएको छ ।

यसअघि उनीविरुद्ध दुई वटा सहकारीमा मुद्दा दायर गरिएको थियो । उनीविरुद्ध बुटवलको सुप्रिम सहकारी र काठमाडौं पुतलीसडकमा रहेको नाता बचत तथा ऋण सहकारीमा पनि मुद्दा दायर भएको थियो । अहिले यी दुबै मुद्दा बिचाराधीन अवस्था छन् । तीन वटा सहकारी ठगीका आरोपी बराल एमालेबाट निर्वाचित फिक्कलल गाउँपालिका उपाध्यक्ष हुन् ।