सार्वजनिक लेखा समितिका सभापति पोखरेलका स्वकीय सचिव पक्राउ

२५ पुस, काठमाडौं । एमालेका सांसद तथा संघीय संसदको सार्वजनिक लेखा समितिका सभापति ऋषिकेश पोखरेलका स्वकीय सचिव अनिल पोखरेल पक्राउ परेका छन् । 

ऋषिकेश पोखरेलकी फरार श्रीमती अदालत हाजिर भएर १० लाख धरौटीमा छुटेको भोलिपल्टै बिहीबार बिहान प्रहरीले जिल्ला प्रहरी कार्यालय नजिकैबाट पोखरेलका स्वकीय सचिवलाई पक्राउ गरेको हो ।

मोरङको रंगेली नगरपालिका २ घर भई काठमाडौं बस्दै आएका ४३ वर्षीय अनिल नेकपा एमाले मोरङ जिल्ला सदस्य हुन् । एमबीबीएस परीक्षा पास गराई दिन भन्दै पैसा लिएको र ठगी गरी आपराधिक लाभ लिएको मुद्दामा पोखरेल पक्राउ परेको जिल्ला प्रहरी कार्यालय, मोरङले जनाएको छ ।

उनले एमबीबीएसमा नाम निकाल्ने भनेर ३८ लाख ८० हजार रुपैयाँ ठगी गरेको आरोप पछि सभापति पोखरेलले उनलाई जिम्मेवारीबाट बर्खास्तसमेत गरेका थिए । यसपछि जाहेरी परेपछि उनी विरुद्ध पक्राउ पुर्जी जारी भएको थियो। उन त्यसपछि फरार रहँदै आएका थिए । 

ऋषिकेश पोखरेलकी फरार श्रीमती अदालत हाजिर भएर १० लाख धरौटीमा छुटेको भोलिपल्टै उनका स्वकीय सचिव पक्राउ परेका हुन् । उनी बुधबार अदालतमा हाजिर भएकी थिइन् । बुधबार नै उनी १० लाख धरौटी बुझाएर छुटेकी थिइन् ।