साढे १५ अंकले बजार ओरालो लाग्दा २५ सयमा झर्याे नेप्से, ६ अर्ब ६५ करोडका शेयर खरिदबिक्री

२९ पुष, काठमाडौं । सोमबार शेयरबजार दोहोरो अंकले घटेको छ । आज नेप्से १५.५४ अंकले घटेर दुई हजार ५ सय ९४ दशमलव १३ विन्दुमा बन्द भयो । आज नेप्सेमा ६ अर्ब ६५ करोड ८ लाख बराबरको कारोबार भएको छ । कारोबार भएकामध्ये ६३ कम्पनीको शेयरमूल्य बढेको छ भने १७५ वटाको घटेको छ । यसका साथै ५ कम्पनीको शेयरमूल्य स्थिर रहेको छ ।

नेप्सेका अनुसार एक कम्पनीको शेयरमूल्यमा सकारात्मक सर्किट लागेको छ भने दुई कम्पनीको शेयरमूल्यमा नकारात्मक सर्किट लागेको छ । सकारात्मक सर्किट लाग्ने कम्पनी बाराही हाइड्रोपावर पब्लिक लिमिटेड रहेको छ । आत्मनिर्भर लघुवित्त वित्तीय संस्था र सिन्धु विकास बैंकको शेयरमूल्यमा नकारात्मक सर्किट लागेको छ ।

बैंकहरूको वित्तीय विवरण बिग्रिन सक्ने भन्दै शेयर लगानीकर्तामा परेको मनोवैज्ञानिक प्रभावले लगातार दोस्रो दिन पनि नेप्सेमा दोहोरो अंकको गिरावट देखिएको हो । सोमबार नेप्सेमा सबै उपसूचकमा गिरावट भएको छ । व्यापार उपसूचक सर्वाधिक १.८९ प्रतिशतले गिरावट हुँदा होटल तथा पर्यटन उपसूचक १.३६ प्रतिशत र वित्त कम्पनी उपसूचक १.३२ प्रतिशतले गिरावट भएको छ ।

सुपर मादी हाइड्रोपावरको शेयर मूल्य ८.८७ प्रतिशत, नारायणी डेभलपमेन्ट बैंक ८.८१, सपोर्ट लघुवित्त ८.४१ र नेपाल एसबीआई बैंकको सेयर मूल्य ७.३० प्रतिशतले बढेर बन्द भएको छ । आत्मनिर्भर लघुवित्त र सिन्धु विकास बैंकको शेयर मूल्य १० प्रतिशत घट्दै नकारात्मक सर्किट मूल्यमा बन्द भएको छ । त्यस्तै रिभर फल्स हाइड्रपोवरको शेयर मूल्य ८.३६ प्रतिशतले घटेको छ ।

सोमबार बजारमा एनआरएन इन्फ्रास्ट्रक्चर एन्ड डेभलपमेन्ट कम्पनीको शेयर सर्वाधिक ४५ करोड २६ लाखको कारोबार भएको छ । त्यस्तै न्यादी हाइड्रोपावर २८ करोड २७ लाख र हिमालयन पावर पार्टनरको १५ करोड ६० लाख रुपैयाँ बराबर शेयर कारोबार भएको छ ।