प्रचण्डलाई मोर्चा बनाउन हतार, झलनाथमा छैन रुची

२ माघ, काठमाडौं । सत्तारुढ दुई दल नेकपा एमाले र नेपाली कांग्रेसको बलियो सरकार बनेपछि विपक्षी दलहरूले सदन र सडकमा बलियो उपस्थिति देखाउन मोर्चा बनाउने तयारी गरेका छन् । कांग्रेस एमालेबीच तत्कालै सहकार्य टुटने संभावना कमजोर भएपछि नेकपा माओवादीका अध्यक्ष पुष्पकमल दाहाल र नेकपा एसका अध्यक्ष माधवकुमार नेपालले सदन र सडकमा बलियो उपस्थिति देखाउनका लागि मोर्चा बनाउने तयारी गरेका हुन् । त्यसका लागि मधेशवादी दल जनता समाजवादी पार्टीका अध्यक्ष उपेन्द्र यादवसँग कुराकानी गर्नै जिम्मेवारी माधव नेपालले लिएका छन् ।

आफूहरू बीचको सहकार्य २०८४ को चुनावसम्म नटुट्ने दाबी गरिरहँदा सत्ताबाहिर रहेका दलहरूले फरक–फरक मोर्चाबन्दीको कसरत गर्दा नेकपा एसभित्र भने विवाद भएको छ । संसदको तेस्रो शक्ति माओवादीदेखि मधेश केन्द्रित दलहरूसँग एकतासम्मको लक्ष्य लिएर गोलबद्ध हुने प्रयासमा छन् । तर सैद्धान्तिक धरातल भन्दा बाहिर गएर सत्ताका लागि छिन्नभिन्न हुने, सत्ताबाहिर हुँदा मन मिल्ने दलहरूको प्रवृत्तिले यस्ता मोर्चाबन्दीको प्रयासले तात्विक परिणाम भने दिन नसकेको भन्दै खनालले आपत्ति जनाएका हुन् ।

प्रमुख प्रतिपक्षी दल माओवादी केन्द्र आफू सत्तामै रहेका बेला गठित समाजवादी मोर्चालाई ब्यूँताउने कसरतमा लागेको छ । हाल नेकपाका महासचिव नेत्रविक्रम चन्द संयोजक रहेको मोर्चामा एकीकृत समाजवादी र महेन्द्र राय यादव नेतृत्वको नेपाल समाजवादी पार्टी छन् । तर मोर्चाभित्रका दलहरू स्वयं यसको आवश्यकता र औचित्यमा स्पष्ट छैनन् । उपेन्द्र यादवको जसपा यसबाट बाहिरिएपछि अहिले सहभागी हुन आनाकानी गरिरहेको छ ।

आफ्नै आन्तरिक समस्याले जेलिएका दलहरूले अन्तर्दलीय मोर्चालाई बलियो बनाउन सक्नेमा तिनकै नेताहरूमा शंका छ । ‘म यो देशलाई अगाडि बढाउँछु , सम्बृद्धिको बाटो लैजाने मार्गचित्र यो हो भने कुनै दल र नेता अघि आएका छैनन् सबै आफ्नो गुटको स्वार्थमा छन् ,’ एकीकृत समाजवादी पार्टीका सम्मानित नेता झलनाथ खनालले मंगलबार एक सार्वजनिक समारोहमा भने । उनले यस्ता विषयमा तत्काल छलफल गर्नुभन्दा जनतालाई डेलिभरी दिने काममा लाग्नु उपयुक्त हुने सुझाव पनि दिए ।

प्रधानमन्त्री केपी शर्मा ओलीले राजनीतिक दलसम्बन्धी अध्यादेशको तयारी गर्नु, साना दलहरुलाई संकट उब्जाउने गरि निर्वाचन प्रणालीमा संशोधन र थ्रेसहोल्ड फेरबदलको आशंकामा मधेश केन्द्रीत दलहरू फरक मोर्चाबन्दीको प्रयासमा छन् । सरकारलाई समर्थन दिएका जनमत पार्टी र अशोक राई समूहको जसपा नेपाल पनि यो दौडमा छन् । तर उपेन्द्र यादव सहभागी हुने भएपनि राई समूहको उपस्थिति नहुने बताइएको छ ।

राजनीतिक दलहरूले आफू अनुकूल सहकार्य, मोर्चाबन्दी र एकतासम्म गरेपनि त्यो टिकेको अवस्था भने देखिएको छैन । आफू कमजोर हुँदा मोर्चाबन्दी गर्ने तर अवसर आइलाग्दा छाडेर भाग्ने प्रवृत्तिका कारण पनि दलहरूको मोर्चाबन्दी लामो समय टिकेको देखिँदैन । प्रचण्डको स्वभावकै कारण अन्य दलहरूले मोर्चाप्रति त्यति विश्वास नगरेपछि रवि लामिछाने छुटेपछि रास्वपासँग पनि मोर्चाबन्दी गर्ने प्रचण्डको योजना रहेको छ । कांग्रेस र एमालेमा फाटो नआई अन्य दलले गठबन्धन तलमाथि पार्न गणितीय हिसाबले सम्भव छैन । समाजवादी मोर्चामा जम्मा चार दल आबद्ध छन् । नेकपा माओवादी केन्द्रका ३२ र नेकपा एकीकृत समाजवादी पार्टीका १० गरी प्रतिनिधि सभामा उनीहरूको जम्मा ४२ सांसद मात्र छन् । मोर्चामा रहेको नेत्रविक्रम चन्द नेतृत्वको नेपाल कम्युनिस्ट पार्टी निर्वाचन आयोगमा दर्ता भएको छैन ।

तर, प्रचण्डले गठबन्धन लामो समय नजाने दाबी गर्नु र त्यहीबेला समाजवादी मोर्चा पनि सक्रिय पार्नुले विभिन्न राजनीतिक अड्कलबाजीलाई जन्माइरहेको छ । तर, समाजवादी मोर्चा र स्वयं प्रचण्डले सरकार ढाल्ने खेलमा आफू नलाग्ने बताइरहेका छन् ।