कांग्रेसका मन्त्रीलाई देउवाले बोलाए बुढानिलकण्ठ

२ माघ, काठमाडौं । नेपाली कांग्रेसले पार्टीबाट सरकारमा गएका मन्त्रीहरूसँग अहिलेसम्म भएका कामकारवाहीबारे छलफल गर्ने भएको छ । उनीहरुलाई बिहीबार बिहान पार्टी सभापति शेरबहादुर देउवाको निवास बुढानिलकण्ठमा बोलाइएको छ ।  

कांग्रेसबाट १० मन्त्री र २ राज्यमन्त्री गरी १२ जना सरकारमा सहभागी छन् । सरकारका काम र आफ्नै मन्त्रीहरूको भूमिकामाथि पार्टीभित्र प्रश्न उठ्न थालेपछि उनीहरुलाई सभापति देउवाले छलफलमा बोलाएका हुन् ।  

सभापति देउवाले संसदीय दलको कार्यसमिति र मन्त्रीहरू बीच अर्न्तक्रियाका लागि बैठक बोलाइएको गृहमन्त्री रमेश लेखकले बताए । सरकारमा सहभागी भएका केही मन्त्रीहरूको प्रभावकारितालाई लिएर पार्टीभित्र प्रश्न उठिरहेकाले त्यस बिषयमा पनि छलफल हुन लागेको हो ।