आफूलाई अभियन्ता बताउने आशिका तामाङ पक्राउ

२ माघ, काठमाडौं । प्रहरीले आफूलाई अभियन्ता बताउँदै आएकी आशिका तामाङलाई पक्राउ गरेको छ । उनले बजारमा अनेक थरी भिडियो बनाएर सामाजिक सञ्जालमा राख्दै आएकी थिइन् । अभद्र व्यवहार गरेको आरोपमा तामाङलाई गौशाला प्रहरीले बुधबार दिउँसो पक्राउ गरेको हो ।

तामाङलाई पक्राउ गरिएको काठमाडौं जिल्ला प्रहरी परिसरका एसपी नवराज अधिकारीले पुष्टि गरेका छन् । पुर्जी लिएर प्रहरीले तामाङलाई पक्राउ गरेको हो । अभद्र व्यवहार मुद्दाको अनुसन्धानका लागि  तामाङलाई नियन्त्रणमा लिनु परेको प्रहरीले जनाएको छ ।

पछिल्लो समय पशुपति क्षेत्र विकास कोष परिसरमा तामाङले महिला प्रहरीलाई दुर्व्यवहार गरेको भिडिओ सामाजिक सञ्जालमा भाइरल बनेको थियो । उनले विभिन्न ठाउँमा गएर अनुसन्धान गरे जस्तै विभिन्न भिडियो बनाउने र सामाजिक सञ्जालमा राख्ने गर्दै आएकी थिइन् ।