संवैधानिक इजलासबाट न्यायाधीश फुयाल बाहिरिएपछि ५२ जना पदाधिकारीको विवादमा सुनुवाइ भएन

२ माघ, काठमाडौं । संवैधानिक इजलासबाट न्यायाधीश हरिप्रसाद फुयाल बाहिरिएपछि आजका लागि पेशी तोकिएको संवैधानिक निकायका ५२ जना पदाधिकारीको नियुक्ति विवादको सुनुवाइ फेरी सरेको छ । अब यो मुद्दा हेर्न अर्को संवैधानिक इजलास गठन गर्नुपर्नेछ । न्यायाधीश कुमार रेग्मीले यो रिट हेर्न नमिल्ने देखिएको छ । सुनुवाइका लागि अर्को पेसी माघ ३० गते तोकिएको छ ।

बुधबार प्रधानन्यायाधीश प्रकाशमानसिंह राउत र न्यायाधीशहरू सपना प्रधान मल्ल, हरिप्रसाद फुयाल, मनोजकुमार शर्मा र नहकुल सुवेदी रहेको इजलासमा पेसी चढेको थियो । उक्त रिटमा सुनुवाइको पालो आएपछि न्यायाधीश हरिप्रसाद फुयालले आफूले हेर्न नमिल्ने भन्दै अलगिएको घोषणा गरेका थिए ।

तत्कालीन केपी शर्मा ओली नेतृत्वको संवैधानिक परिषद्को सिफारिसमा नियुक्त भएका ५२ जना संवैधानिक पदाधिकारीसम्बन्धी विवाद ४ वर्षदेखि सर्वोच्चमा विचाराधीन छ । २०७७ सालमा सुरू भएको विवाद संवैधानिक इजलासमा विभिन्न कारणले सुनुवाइ प्रभावित हुँदै आएको छ ।