राती एक्कासी कसरी आयो इन्टरनेटमा समस्या ?

२० माघ, काठमाडौं । आइतबार साझदेखि काठमाडौं उपत्यका लगायतका क्षेत्रमा इन्टरनेट सेवामा समस्या आयो । विभिन्न सेवा प्रदायकको इन्टरनेट कनेक्टिभिटीमा समस्या देखिएकाले समाधान गर्ने प्रयास भइरहेको नेपाल टेलिकमले जानकारी दियो । कहिले १५ मिनेट त कहिले ५ मिनेट पर्खनुस भन्दै जानकारी दिइयो । फाइबर इन्टरनेटसँगै मोबाइल इन्टरनेट सेवामा समस्या आएको हो । 

नेपाल टेलिकम, एनसेल, वल्र्डलिंक, भायानेट, डिसहोम लगायत फाइबर इन्टरनेट सेवा प्रदायक कम्पनीहरूको कनेक्टिभिटीमा इन्टरनेट नचल्ने, ढिलो हुने, बारम्बार ’डिस्कनेक्ट’ हुने जस्ता समस्या देखिएको थियो । प्रयोगकर्ताहरूले इन्टरनेट नचलेको गुनासो सामाजिक सञ्जालमार्फत पनि गरे । 

निकै प्रयासपछि नेपाल टेलिकमका प्रवक्ता हरि ढकालले अन्तर्राष्ट्रिय ब्यान्डविथ समस्या आएको जानकारी दिए । ब्यान्डविथ पठाउने भारतीय कम्पनी एयरटेलको लिंकमा आएको समस्याले गर्दा नेपाली सेवा प्रदायकहरूको कनेक्टिभिटीमा असर परेको उनको भनाइ छ । इन्टरनेटमा अन्तर्राष्ट्रिय रूपमै समस्या आएको टेलिकमको बुझाइ छ । इन्टरनेट सेवा प्रदायकहरूको छाता संगठन आइस्पानका अध्यक्ष सुधीर पराजुलीले पनि एयरटेल नेटवर्कमा समस्या आइरहेको नेपालबहसलाई जानकारी दिए ।