पोखरामा कांग्रेसका जिल्ला सभापतिलाई प्रशिक्षण, स्थिरता दिन प्रतिस्पर्धी पार्टी मिलेको देउवाको तर्क

२२ माघ, काठमाडौं । नेपाली कांग्रेसले कास्कीको पोखरामा आजदेखि जिल्ला पार्टी सभापति र जिल्ला प्रशिक्षण प्रमुखहरूको लागि अभिमुखीकरण दिन थालेको छ । पार्टीको आन्तरिक पक्ष र संगठनलाई बलियो बनाउँदै आगामी नीतिहरुबारे जानकारी दिन प्रशिक्षण दिइएको हो । माघ २० गतेदेखि नै कांग्रेसले पोखरामा कार्यक्रम राखेको हो । ७७ वटै जिल्लाबाट सभापतिसहितका नेताहरु पोखरा आएका छन् ।   
 
अभिमुखीकरणको शुभारम्भ गर्दै नेपाली कांग्रेसका सभापति शेरबहादुर देउवाले सरकारको बचाउ गरेका छन् । उनले प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीको अविश्वास गर्न पर्ने कारण नभएको बताए । उनले दुई ठूला प्रतिस्पर्धी पार्टी एक भएर राजनीतिक स्थिरता दिने प्रयास गरेको बताए । ओली र म सँगै जेलमा बसेको उनले सुनाए । 

दुई प्रमुख प्रतिस्पर्धी पार्टीहरूबीच गठबन्धनबाट सरकार बनाउने कुरा कसरी आयो भन्ने पनि आवाज उठेका छन् । अहिलेको बेला मात्रै होइन, धेरै वर्षसम्म एमाले र कांग्रेसबीच सहमति भयो भने राजनीतिक स्थिरता स्थापित हुन सक्दछ । कतिबेला सरकार ढल्ने हो, कति दिन चल्ने हो भन्ने पनि थाहा हुँदैन । दुइवटा पार्टी मिलेर सरकार बनेको छ, यसको स्थायित्व स्पष्ट छ, देउवाले भने ।

उनले देशको विकासका लागि ओली स्पष्ट भएपछि सँगै गठबन्धन गरेर गएको उनको भनाइ छ ।  देउवाले देशमा जुन विकास हुनुपर्ने हो त्यो गतिमा नभएकोले अझै गर्न बाँकी रहेको बताए । उनले भने, केही समस्या आउन सक्छन् । यसलाई समाधान गर्दै जानुपर्ने हुन्छ । स्थिरता भयो भने नेपालको विकास अझै धेरै हुन्छ भन्ने विश्वास छ । जुन विकास हुनुपर्ने हो भएको छैन ।  देउवाले विद्यार्थीकालमा पोखरामा आउँदा माछापुच्छ्रे हिँउले छोपेको याद ताजै रहको भन्दै थपे– अहिले क्लाइमेट चेन्जले गर्दा हिमाल कालो भएको छ ।