मोदीको शपथका लागि प्रधानमन्त्री ओली दिल्ली जाने

काठमाडौं । भारतमा लोकसभा निर्वाचनबाट दोस्रो कार्यकालका लागि निर्वाचित भारतीय प्रधानमन्त्री नरेन्द्र मोदीको आगामी बिहीबार हुने शपथका लागि प्रधानमन्त्री केपी शर्मा ओली नयाँ दिल्ली जाने भएका छन्।

बिमस्टेक राष्ट्रका सरकार प्रमुख तथा राष्ट्रप्रमुखहरुलाई निम्ता गर्ने क्रममा प्रधानमन्त्री ओलीलाई शपथग्रहण समारोहमा सहभागी हुन निम्ता आएको र प्रधानमन्त्री ओली यसप्रति सकारात्मक देखिएका छन् ।

प्रधानमन्त्री ओली मे ३० का दिन बिहीबार काठमाडौँबाट नयाँ दिल्ली प्रस्थान गर्ने, बेलुका शपथमा सहभागी हुने र भोलिपल्ट राष्ट्रपति रामनाथ कोविंन्दलाई भेटेर नेपाल फर्कने कार्यक्रम रहेको स्रोतले जानकारी दिएको छ ।

भारतीय लोकसभा निर्वाचनको बिहीबार प्राप्त नतिजाअनुसार भाजपा एक्लैले ३०३ सिट र भाजपा गठबन्धनले ३५३ सिट प्राप्त गरेपछि नरेन्द्र मोदीले भारतीय प्रधानमन्त्रीका रुपमा दोस्रोपटक शपथ लिन लागेका हुन्।