स्थानीय पूर्वाधार विकास साझेदारीका लागि प्रत्येक सांसदलाई ६ करोड

काठमाडौं । सरकारले स्थानीय पूर्वाधार विकास साझेदारी कार्यक्रमअन्तर्गत प्रत्येक सांसदलाई ६ करोड बजेट दिने भएको छ ।

बुधबार संघीय संसद्‌मा बजेट भाषण गर्दै अर्थमन्त्री युवराज खतिवडाले सांसदलाई दिइने निर्वाचन क्षेत्रको बजेट ६ करोड पुराएको बताएका छन् ।

गत वर्ष उक्त कार्यक्रमअन्तर्गत संघीय संसद्का सदस्यहरुले ४ करोड पाएका थिए । सांसदहरुका लागि कूल ९ अर्ब छुट्याइएको छ । खतिवडाले पूर्व पश्चिम राजमार्गलाई डेडिकेटेड चार लेनको बनाउन काम सुरु गरिने बताए ।

यस्तै सडक मर्मतको लागि पेट्रोलियम पदार्थमा १ रुपैयाँ थप कर लगाइने उहाले बताउनुभयो । यस्तै द्रुतमार्गलाई १५ अर्ब १ करोड, कान्तिपथको लागि ६१ करोड, गल्छी त्रिशुली मैलुङ सडकका लागि १ अर्ब ५८ करोड, बीपी राजमार्गका लागि ९६ करोड, मदन भण्डारी राजमार्गको लागि ४ अर्ब ८२ करोड विनियोजन गरिएको छ ।

सरकारले आगामी आर्थिक वर्षका लागि रेल, सडक, पुल तथा पूर्वाधार क्षेत्रका लागि १ खर्ब ६३ अर्ब ५२ करोड रुपैयाँ विनियोजन गरेको छ । त्यस्तै सरकारले गौतमबुद्ध अन्तराष्ट्रिय विमानस्थलको निर्माण कार्य सम्पन्न गरी आगामी आर्थिक वर्षभित्र सञ्चालनमा ल्याउने भएको छ ।

हाल करिब ७४ प्रतिशत निर्माण कार्य सम्पन्न भएको सो विमानस्थलका लागि मात्रै सरकारले तीन अर्ब ३४ करोड रुपैयाँ बजेट विनियोजन गरेको अर्थमन्त्री खतिवडाले बताए ।

त्यस्तै सरकारले आगामी आर्थिक वर्षमा युवा तथा खेलकुदको लागि ३ अर्ब ९९ करोड बजेट बिनियोजन गरेको छ । त्यस्तै सरकारले खेलकुद मैदान निर्माणमा विशेष जोड दिए ।