आगलागीबाट सात लाखको क्षति

झापा । झापाको अर्जुनधारा–८ स्थित गोपीबहादुर कामीको घरमा आज बेलुका ८ः३० बजे आगलागी भएको छ ।आगलागीबाट एकतले जस्ताले छाएको घर जलेर पूर्णरुपमा नष्ट भएको इलाका प्रहरी कार्यालय बिर्तामोडका प्रमुख प्रहरी नायब उपरीक्षक मोहन थापाले जानकारी दिए ।

उनका अनुसार खाना पकाउने क्रममा ग्यास लिक भई एक्कासि आगलागी भएको हो । आगलागीबाट रु ५० हजार, २५ मन धान, लत्ताकपडालगायत घर जलेर नष्ट भएको छ ।

“एक्कासि घटना भएपछि स्थानीयवासीले आगलागी नियन्त्रणको प्रयास गरे पनि त्यो सफल हुन सकेन”, प्रमुख थापाले भने, “बिर्तामोड नगरपालिको दमकलले आगो नियन्त्रणमा लिए पनि घर पूर्णरुपमा नष्ट भएको छ ।” हाल आगलागी पीडित गोपीबहादुरको छ जनाको परिवारलाई बिर्तामोड नगरपालिकाको आश्रयमा राखिएको छ ।