आज राष्ट्रपति ट्रम्प राजकीय भ्रमणका लागि बेलायत जाँदै, विरोधमा प्रदर्शनको तयारी !

एजेन्सी । अमेरिकी राष्ट्रपति डोनाल्ड ट्रम्प राजकीय भ्रमणका लागि बेलायत जाँदै छन् । ट्रम्प स्थानीय समय अनुसार ‘आज’ सोमबार बिहान बेलायत पुग्ने कार्यक्रम रहेको छ । त्यहाँ ट्रम्पले तीन दिन बिताउने छन् ।

एयर फोर्स वनको विमान मार्फत ट्रम्प बेलायत पुग्ने छन् । ट्रम्पका साथमा प्रथम महिला मिलानिया ट्रम्प पनि भ्रमणमा सहभागी हुँदै छिन् । बेलायतकी महारानी एलिजाबेथले सोमबार बेलुका ट्रम्प र मिलानियाको सम्मानमा रात्री भोजको आयोजना गर्दै छिन् ।

ट्रम्पको भ्रमणको विरोधमा बेलायतका विभिन्न स्थानमा प्रदर्शनको तयारी छ । लण्डन, म्यानचेस्टर, बेल्फास्ट, बर्मिङ्ग्हम र नटिङ्ग्हममा प्रदर्शनकारीले र्‍यालीको तयारी गरेको बिबिसीले उल्लेख गरेको छ ।

भ्रमणअघि द सनसँगको कुराकानीमा ट्रम्पले बेलायतको भावी प्रधानमन्त्रीका रुपमा आफ्नो समर्थन बोरिस जोन्सनलाई रहेको बताएका छन् । यस्तै उनले द टाइम्ससँग भने जस्तो नभए बेलायत युरोपियन युनियनबाट तत्काल बाहिरिनु पर्ने बताएका छन् ।