१३ औ दक्षिण एसियाली गर्न ५ अर्व २५ करोड आवश्यक !

काठमाडौं । आसन्न १३ औ दक्षिण एसियाली खेलकुद प्रतियोगिता आयोजना गर्न करिब ५ अर्व २६ करोड रुपैयाँ अनुमानित बजेट प्रस्ताव गरिएको छ । खेलकुद मन्त्री जगत विश्वकर्मा संयोजकत्वको प्रतियोगिता तयारी तथा व्यवस्थापन समितिले गठन गरेको बजेट निर्माण कार्यदलले बिज्ञसंग छलफल गर्दै झण्डै साढे ५ अर्वको अनुमानित बजेट पेश गरेको हो ।

कार्यदल संयोजक तथा राखेप उपाध्यक्ष पिताम्बर तिम्सिनाले अनुमानित बजेटको प्रतिवेदन आइतबार सिंहदरबारमा मन्त्री विश्कर्मालाई हस्तान्तरण गरे । यसअघि बसेको प्रतियोगिताको तयारी तथा व्यवस्थापन समितिको बैठकमा राखेप सदस्य सचिव केशवकुमार विष्टले करिव साढे ३ अर्वमा साग आयोजना गर्न सकिने बताएका थिए । तर कार्यदलले झण्डै दोब्बर बजेट अनुमान गर्दै प्रतिवेदन पेश गरेको छ ।

कार्यदलले विभिन्न १७ समितिको शीर्षक राखेर अनुमानित बजेट निर्धारण गरेको छ । बजेट प्रतिबेदन बुझ्दै मन्त्री विश्वकर्माले सागको तयारी तिव्र रुपमा भइरहेको जानकारी दिए । सागमा भाग लिनका लागी सहभागी राष्ट्रहरुलाई आमन्त्रण पत्र पठाइसकेको उनले बताए । मन्त्री विश्वकर्माले तयारी समितिले पनि छिटै पूर्णता पाउने बताए ।

कार्यदलका अनुसार राष्ट्रिय टिम तयारीमा ८८ करोड १२ लाख रुपैयाँ आवश्यक पर्ने अनुमान गरिएको छ । यस्तै, खेलस्थल व्यवस्थापनमा ३ करोड ११ लाख, प्राविधिक कामका लागि ३० करोड ४० लाख, स्रोत साधन परिचालनमा २० लाख, सुरक्षामा ५० करोड २६ लाख, आवासमा ४५ करोड ५२ लाख, यातायातमा १५ करोड ७ लाख, स्वास्थ्य समितिमा ३ करोड ४३ लाख लाग्ने अनुमान गरिएको छ ।

त्यस्तै प्रचार प्रसारमा ८ करोड ९५ लाख रुपैयाँ लाग्ने अनुमान गरिएको छ । यस्तै, समारोहमा ७१ करोड ४६ लाख, स्वयंसेवक परिचालनमा २ करोड, अतिथि सत्कारमा १ करोड २९ लाख, खेल सामाग्रीमा १ अर्व २९ करोड, एन्टि डोपिङ्गमा ३ करोड ५४ लाख, आयोजक समितिमा २७ करोड, आईटी व्यवस्थापनमा १९ करोड र विविधमा २५ करोड बजेट अनुमान गरिएको छ । २७ खेल सम्मिलित साग गेम्स मंसिर १५ देखि २७ गतेसम्म हुँदैछ । जसका लागि पुर्वाधारको काम पनि भइरहेको छ ।