लिटिल एन्जेल्समा समुदाय–प्रहरी कार्यक्रम सम्पन्न

ललितपुर । महानगरीय प्रहरी कार्यालय रानीपोखरीका प्रमुख प्रहरी नायव महानिरीक्षक शैलेश थापा क्षेत्रीको प्रमुख आतिथ्यमा समुदाय–प्रहरी साझेदारी कार्यक्रम अन्तर्गत लिटिल एन्जेल्स स्कुल ललितपुरमा अध्यनरत विद्यार्थीहरूलाई प्रशिक्षण कार्यक्रम बिहीबार सम्पन्न भएको छ ।

महानगरीय प्रहरी वृत्त सातदोबाटो ललितपुरको सहकार्य तथा समुदाय प्रहरी साझेदारी विद्यालय समिति, लिटिल एन्जेल्स स्कुलको आयोजनामा उक्त प्रशिक्षण कार्यक्रम सम्पन्न भएको हो । कार्यक्रममा प्रहरी नायव महानिरीक्षक क्षेत्रीले लागूऔषध, साइबर क्राइम, सामाजिक संजाल प्रयोग सम्बन्धी चेतनामूलक प्रशिक्षण दिँदै अपराधबाट बच्ने विभिन्न उपायहरुको बारेमा जानकारी दिए । सामाजिक संजालको दुरुपयोगबाट आपराधिक गतिविधिहरु बढ्दै गएको चर्चा गर्दै त्यस्ता अपराधबाट बच्न सदैब सजग हुन विद्यार्थीहरुलाई उनले आग्रह समेत गरे ।

कार्यक्रममा लिटिल एन्जेल्स स्कुल एजुकेशन ग्रुपका वित्त निर्देशक राजेश श्रेष्ठले धन्यवाद ज्ञापन गर्दै समुदाय-प्रहरी साझेदारी अवधारणा अन्तर्गत संचालन भएका विभिन्न कार्यक्रम तथा गतिविधिहरु अत्यन्तै फलदायी भएको चर्चा गरे । सो अवसरमा उक्त स्कुलका प्रिन्सिपल मुकुन्द राज शर्माले स्वागत मन्तव्य व्यक्त गरेका थिए । कार्यक्रममा प्रहरी-विद्यालय समन्वय समितिका पदाधिकारीहरु, विद्यार्थी, अभिभावक लगायत प्रहरी अधिकृतहरुको उपस्थिति रहेको थियो ।