वीर अस्पतालमा रेशम चौधरीमाथि किन भयो यस्तो अमानवीय व्यवहार ?

काठमाडौं । हामी नेपाली हाम्रो समाज हर कुरामा उखानसंग जोडेर कुरा गरिने परम्परा जस्तै भनेको छ । त्यहि समाजका हामी पनि उखान बिना अछुतो कहाँ छौ र नेपाली समाजमा एउटा भनाइ छ, ‘खाने बेलामा कैदीले पनि सुख पाउँछ । तर, निलम्बित सांसद रेशम चौधरीमाथिको व्यवहार हेर्ने हो भने अमानवियताको पनि पराकाष्टा नाघेको छ ।

टिकापुर हत्याकाण्डका आरोपी चौधरी जिल्ला अदालत कैलालीको आदेशमा जेलमा छन् । उनीसहित ११ जनालाई गत फागुनमा जिल्ला अदालत कैलालीले सर्वश्वहरणसहित जन्मकैदको फैसला सुनाएको थियो ।

डिल्लीबजार कारागारमा रहेका चौधरीको स्वास्थ्य अवस्था गम्भीर भएपछि उपचारका लागि वीर अस्पताल भर्ना गरिएको छ । रातदिन सुरक्षाकर्मीले पहरा दिइरहेका छन् । त्यतिसम्म त स्वाभाविकै हो, तर उनलाई अस्पतालको शैय्यामा समेत हातमा हथ्कडी र खुट्टामा नेल लगाइएको छ ।

ढाडको नशामा समस्या देखिएपछि उनलाई बिहीबार साँझ अस्पताल लगिएको हो । वीर अस्पताल प्रशासनले चौधरीको स्वास्थ्य अवस्था सुधारोन्मुख रहेको जनाएको छ । बस्न र उठ्नसमेत अरुको सहारा चाहिले चौधरीलाई किन नेल र हथ्कडी लगाइएको होला भनेर अस्पतालमा रहेका अन्य बिरामी, बिरामी कुरुवा र चिकित्सक तथा स्वास्थ्यकर्मीले समेत प्रश्न गरिरहेका छन् ।

संविधानको विरोधमा ०७२ भदौ ७ गते कैलालीको टिकापुरमा भएको प्रदर्शनका क्रममा नेपाल प्रहरीका एसएसपी लक्ष्मण न्यौपानेसहित ९ जनाको ज्यान गएको थियो । चौधरी सोही घटनाका मुख्य आरोपी हुन् । घटनापछि लामो समय भारतमा भूमिगत बसेका उनी भूमिगत रुपमै प्रतिनिधिसभा निर्वाचनमा कैलाली–१२ बाट राजपाका तर्फबाट निर्वाचित भएका हुन् ।