नेकपा सचिवालय बैठक : प्रधानमन्त्री ओलीको युरोप भ्रमणका बिषयमा विफ्रिङ !

काठमाडौं । सत्तारुढ दल नेपाल कम्युनिष्ट पार्टी (नेकपा)ले पार्टीको राजनीतिक प्रतिवेदनलाई सम्पादनमा लैजाने निर्णय गरेको छ । प्रधानमन्त्री निबास बालुवाटारमा शनिबार बसेको नेकपा सचिवालय बैठकले राजनीतिक प्रतिवेदनलाई सम्पादनका लागि पठाउने निर्णय गरेको महासचिव बिष्णु पौडेलले जानकारी दिए ।

प्रतिवेदन सम्पादन भएपछि सार्वजनिक गर्ने निर्णय भने आगामी बैठकमा हुने बुझिएको छ । १३ महिना अघि तयार भएको राजनीतिक प्रतिवेदन अझै छापिन सकेको छैन् । एकता प्रक्रिया छिटो टुङ्गयाउने बिषयमा छलफल भएपनि कुनै निर्णय नभएको उनले बताए । एकीकरणका बाकीकामलाई छिटो भन्दा छिटो सम्पन्न गर्नका लागी केहि गृहकार्य बाकी रहेको महासचिव पौडेलले जानकारी दिए ।

बैठकमा प्रधानमन्त्री केपी शर्मा ओलीले आफ्नो युरोप भ्रमणका बिषयमा पार्टी नेतृत्वलाई विफ्रिङ गरेका थिए । केन्द्रीय सदस्यहरुको कार्यविभाजन टुङ्गो लगाउन भनेर बसेको सत्तारुढ नेपाल कम्युनिष्ट पार्टी नेकपाको सचिवालय बैठकमा प्रधानमन्त्री ओलीले आफ्नो भ्रमणबारे बिफ्रिङ गराएको नेता बामदेव गौतमले जानकारी दिए ।

यसअघि गत जेठ २३ गते बसेको बैठकमा पार्टी केन्द्रीय सदस्यको कार्यविभाजनका विषयमा छलफल भए पनि प्रधानमन्त्री तथा पार्टी अध्यक्ष ओली युरोप भ्रमणमा जानुपर्ने र कार्यविभाजनबारे तयारी नपुगेको भन्दै स्थगित गरिएको थियो । सचिवालयको अर्को बैठक छिटै बोलाइने नेताहरुले बताएका छन् ।