काठमाडौं कांग्रेसका उपसभापतिमा माली

काठमाडौं । नेपाली कांग्रेस काठमाडौंका उपसभापतिमा विजय माली मनोनीत भएका छन् । कांग्रेस काठमाडौंका सभापति कृष्ण बानियाँको अध्यक्षतामा बुधबार बिहान बसेको बैठकले मालीलाई उपसभापतिमा मनोनयन गरेको हो ।

कार्यसमितिका सचिवमा शङ्कर मल्ल ठकुरी र सहसचिवमा रोमेल श्रेष्ठ रहेका कांग्रेस काठमाडौंका सदस्य युपी लामिछानेले जानकारी दिए । काठमाडौं कांग्रेसले यसअघि नै रिक्त सदस्य मनोनयन गरे पनि पदाधिकारी भने मनोनयन गर्न बाँकी रहेको थियो ।

उक्त पदमा मनोनयन भएसँगै काठमाडौं कांग्रेस जिल्ला कार्यसमितिले पूर्णता पाएको छ । नवनियुक्त पदाधिकारीलाई आजै कांग्रेसका पूर्वमहामन्त्री प्रकाशमान सिंहले बधाई तथा शुभकामना दिएका छन् ।