नेपाल स्टक एक्सचेन्जले दोस्रो बजारबारे प्रशिक्षण दिने

काठमाडौं । नेपाल स्टक एक्सचेन्जले दोश्रो बजारको बारेमा प्रशिक्षित गर्न प्रशिक्षण अभियान चलाउने भएको छ ।

सोमबार काठमाडौँमा नेप्से अनलाइन कारोबारको प्रगति बारेमा आयोजना गरिएको पत्रकार सम्मेलनमा काठमाडौँ बाहिरका ग्राहक र बिद्यार्थीहरुलाई शेयर बजार बारे जानकारी दिन प्रशिक्षण अभियान चलाउने जानकारी दिएको हो ।

नेपाल स्टक एक्सचेन्जका प्रमुख कार्यकारी अधिकृत चन्द्रसिं सावदले नेप्सेले अनलाइनको माध्यमबाट कारोबार सुरु गरे पछि देश भरिबाट शेयर किनबेच गर्न सकिने भएकोले दोश्रो बजारमा आउन इच्छुक सबैलाई शेयर कारोबार र अनलाइन कारोबार बारे जानकारी दिन आवश्यक रहेको बताए ।

दोश्रो बजारमा कारोबार गर्नेको संख्या काठमाडौँ उपत्यकाको तुलनामा उपत्यका बाहिरको संख्या बढ्दै गएकोले शेयर दलाल र बिद्यार्थीहरुलाई प्रशिक्षण दिन लागिएको बताए ।

नेपाल स्टक एक्सचेन्जले गएको कार्तिक २० बाट शेयर कारोबारको अनलाइन प्रणाली सुरु गरेको हो । यसबाट शेयर किनबेच, भुक्तानी र शेयर कारोबार सम्बन्धी अन्य सबै काम हुँदै आएको छ । नेप्सेको अनलाइन प्रणाली विभिन्न क्लियरिङ्ग कम्पनिहरु सँग पनि जोडिएको हुदा शेयर सम्बन्धि सबै काम छिटो हुन थालेको छ ।

अहिले अनलाइन प्रणालीमा सुचिकृत भएर एघार हजार बढी शेयर दलालहरुले कारोबार गरिरहेका छन् । हालसम्म अनलाइन प्रणाली मार्फत करिब १० अर्ब ६० करोड ३४ लाख कारोबार भएको नेपाल स्टक एक्सचेन्जले जानकारी दिएको छ ।