विप्लव समुहका नेता लामा काठमाडौंबाट पक्राउ

काठमाडौं । प्रहरीले विप्लव समूहका नेता एवं काठमाडौं उपत्यका व्युरो इन्चार्ज माइला लामालाई पक्राउ गरेको छ । उनी गएराती काठमाडौंको काँडाघारीबाट पक्राउ परेका हुन् । लामासँगै रेशम तामाङ पनि पक्राउ परेका छन् । उनीहरुको साथबाट चारवटा मोबाइल र विप्लव समूहको दस्तावेज बरामद भएको प्रहरीले जनाएको छ ।

काठमाडौंका नख्खु, अनामनगर, सुकेधारा लगायतका विभिन्न स्थानमा भएको बम विस्फोटमा लामाको संलग्न रहेको प्रहरीले जनाएको छ । काठमाडौं सीतापाइला बस्दै आएका लामा विप्लव समूहको एक प्रभावशाली नेता हुन् । २०६४ सालको पहिलो संविधानसभा काठमाडौंबाट चुनाव लडे पनि पराजित भएका थिए ।

लामा तत्कालीन माओवादीको जनसाँस्कृतिक महासंघको अध्यक्षसमेत थिए । तर, पार्टी बिभाजनपछि मोहन वैद्य हुँदै उनी विप्लव समूहमा लागेका थिए ।