गत आबमा स्याङ्जामा करोडाैं बजेट रकम फ्रिज

स्याङ्जा । स्याङ्जामा आर्थिक वर्ष २०७५/०७६ मा संघीय सरकारबाट प्राप्त रु.५ अर्ब ६८ करोड ५१ लाख ९ हजार ४ सय ६९ रुपैयाँ अर्थात ९८ प्रतिशत खर्च भएर रु. १० करोड ९२ लाख ३९ हजार ४ सय १२ रुपैयाँ फ्रिज भएको छ । संघबाटै प्राप्त पुँजीगत खर्चमा रु.५९ करोड २८ लाख ५४ हजारमा ७८.६४ प्रतिशत खर्च हुँदा रु.१२ करोड ६६ लाख १५ हजार ५८ रुपैयाँ फ्रिज भएको छ ।

कुल बजेट रु.६ खर्ब २७ करोड ७९ लाख ६३ हजार ४ सय ६९ रुपैयाँमा ९६.२४ प्रतिशत खर्च भएकोमा असार महिनामा मात्रै बजेटको १४.६२ प्रतिशत खर्च भएको कोष तथा लेखा नियन्त्रण कार्यालयले जनाएको छ ।

प्रदेश सरकारले सोहि वर्ष दिएको चालु खर्च रु.४७ करोड ६० लाख ८४ हजार ९ सय ९८ रुपैयाँ मध्ये ८२.३४ प्रतिशत खर्च हुँदा रु.८ करोड ४० लाख ६९ हजार ५ सय ५२ रुपैयाँ फ्रिज भएको छ । प्रदेश सरकारको पुँजीगत तर्फ रु. १ अर्ब ७ करोड ६७ लाख १९ हजार प्राप्त भएकोमा ८६.४२ खर्च भएर रु. १४ करोड ६१ लाख ७० हजार १ सय ५३ रुपयाँ फ्रिज भएको लेखा कार्यालयले जनाएको छ ।

बजेट कायान्वयन गर्ने सरकारसँग तोकिएको समयसीमा नहुँदा सरकारी निकायले जथाभावी खर्च गर्ने परम्परालाई निरन्तरता दिएका छन् । फलस्रुप प्रदेश सरकारबाट प्राप्त चालु खर्च शिर्षक बजेटको ४३.२९ प्रतिशत असार महिनामै सकिएको छ । पुँजीगत खर्चतर्फ भने असार महिनामा १३.५८ प्रतिशत खर्च भएको कोष तथा लेखा नियन्त्रक खेमराज घिमिरेले बताए ।

आर्थिक वर्ष २०७५/०७६ मा जिल्लास्थित सरकारी कार्यालयले पुँजीगत खर्च भने सन्तोषजनक गरेका छन् । सामान्यतया चालु खर्च धेरै गर्ने कार्यालयले पुँजीगत खर्च समेत सन्तोषजनक गरेका हुन । संघ अन्र्तगतका ६ कार्यालय र प्रदेश मतहतका ४ कार्यालयले मात्रै ८० प्रतिशत भन्दा कम पुँजीगत खर्च गरेका छन् ।

संघ र प्रदेश सरकारले आर्थिक वर्ष २०७५/०७६ मा जिल्ला ११ स्थानीय तहलाई दिएका रु. ४ अर्ब २८ करोड ८८ लाख २२ हजार १ सय ९६ रुपैयाँको ९९.१२ प्रतिशतले हुन आउने रु. ४ अर्ब २५ करोड १२ लाख २७ हजार ८ सय ५१ रुपैयाँ खर्च गरेका छन् । रु.४ करोड ३ लाख पुँजीगत भने शतप्रतिशत खर्च गरेका छन् ।