जेट एयरवेजका सीइओले दिए राजीनामा

काठमाडौं । आर्थिक संकटका कारण टाट पल्टेको भारतीय निजी वायु सेवा कम्पनी जेट एयरवेजका अर्का अधिकारीले राजीनामा दिएका छन् ।

कम्पनीको मुख्य आर्थिक अधिकारी ‘सीएफओ’ले राजीनामा दिएको एक दिनपछि मंगलबार अर्का मुख्य अधिकारी ‘सीइओ’ विनय दुबेले राजीनामा दिएका हुन् । उनले आफ्नो निजी समस्याले गर्दा राजीनामा दिएको बताएका छन् ।

एयरलाइन्स कम्पनीले भनेको छ, ‘निजी कारणले गर्दा सीइओ दुबेले तत्काल राजीनामा दिएका हुन् ।’ दुबेले राजीनामा दिनुभन्दा अघिल्लो दिन अर्का अधिकारी अमित अग्रवालले पदबाट राजीनामा दिएका थिए । आर्थिक मन्दी भएपछि जेट एयर वेजले गत अप्रिल १७ गतेदेखि आफ्नो उडान बन्द गरेको थियो ।

विनय दुबे अगस्त २०१७ मा जेट एयर वेज कम्पनीसँग जोडिएका थिए । यसअघि उनले डेल्टा एयरलाइन्स जस्ता विभिन्न कम्पनीमा रही काम गरेका थिए ।