ललितानिवास प्रकरणमा समरजङ्ग कम्पनीका प्रमुख र नापी सर्वेक्षक पनि पक्राउ

२४ असार, काठमाडाैं । प्रधानमन्त्रीको सरकारी निवास बालुवाटारको सरकारी स्वामित्वको ललितानिवास क्यम्पको जग्गा हिनामिनामा थप दुई जनालाई प्रहरीको केन्द्रीय अनुसन्धान ब्यूरो (सीआईबी)को टोलीले पक्राउ गरेको छ ।

पक्राउ पर्नेमा जग्गा प्राप्तिका लागि खडा गरिएका कम्पनीका तत्कालीन प्रमुख र कम्पनीलाई जग्गा दिन नापी गर्ने तत्कालीन नापी सर्वेक्षक रहेका छन् । 

सीआईबीका अनुसार काठमाडौंबाट आइतबार नापी सर्वेक्षक लोकहरि घिमिरे र समरजंग कम्पनीका प्रमुख ध्रुवप्रसाद अर्याललाइ पक्राउ गरिएकाे हाे । अर्याल तत्कालीन नापी कार्यालय काठमाडौँबाट ललिता निवासको जग्गा नाप जाँचमा खटिएका सर्वेक्षक थिए । 

यसअघि सोही प्रकरणमा भाटभटेनी सुपरमार्केटका संचालक मिनबहादुर गुरुङ, डिल्लीबजार मालपोतका तत्कालीन प्रमुखलगायत ९ जनालाई सीआईबीले पक्राउ गरी हिरासतमा राखेर अनुसन्धान गरिरहेको छ । 

सरकार स्वामित्वको १४३ रोपनी जग्गा विभिन्न समयमा विभिन्न व्यक्तिले नक्कली कागजात बनाएर कम्पनी र गुठी खडा गराई पास गरेर हिनामिन गरेको पाइएको घटनामा सीआईबीले अनुसन्धान सुरु गरेको हो । जग्गा पास गर्दा मालपोत र नापीका कर्मचारीले जग्गा नै घुस लिएको समेत प्रमाण फेला परेको प्रहरीको दाबी छ । \

प्रकरणमा ५ मन्त्री, ६ सचिव, १८ सहसचिवसमेत गरी ४०६ जनाको संलग्नता रहेको दाबी गरिँदै आएको छ । पक्राउ परेका ३ जना भने ‘पक्राउ नगर्नू’ भन्ने यसअघि सर्वोच्च अदालतले दिएको अन्तरिम आदेश देखाएर छुटेका छन् । तर प्रहरीले उनीहरुलाई बोलाएका बखत हाजिर हुन आउने गरी कागज गराई छोडेको हो ।

यो पनि पढ्नुहोस