डोल्पाको त्रिपुरासुन्दरी नगरपालिकामा फेला परेको शव गुल्मपति पण्डितको भएको पुष्टि

२६ भदौ, काठमाडौं । मंगलबार बिहान डोल्पाको त्रिपुरासुन्दरी नगरपालिका–५ स्थित खदाङमा फेला परेको पुरुषको शव सदरमुकाम दुनैस्थित नन्दबक्स गुल्मपटि (मेजर) बिमल पण्डितको रहेको पुष्टि भएको छ । 

मंगलबार बिहान स्थानीय माछा मार्न जाल खेल्दै जाने क्रममा करबगाडस्थित चिन्ढेबगरनजिक भेरीको किनारमा शव देखेपछि प्रहरीलाई खबर गरेका थिए । खबर पाएपछि जिल्ला प्रहरी कार्यालय प्रमुख डीएसपी शिव बुढाथोकीको नेतृत्व प्रहरी टोली शव भएको ठाउमा पुगेको थियो । टोलीले शवलाई सदरमुकाम ल्याएर पहिचान गर्ने क्रममा शव मेजर पण्डितको भएको पुष्टि भएको हो । 

काठमाडौंको कागेश्वरीमनोहरा नगरपालिका डाँछी घर भई डोल्पामा कार्यरत ३८ वर्षीय मेजर पण्डित भदौ १० गते अपरान्हदेखि अंगरक्षकलाई छाडेर सम्पर्कविहीन भएका थिए । शवमा बायाँ हातमा घडी र दायाँ हातको कान्छी औँलामा रहेको औठीबाट शव तत्काल पहिचान भएको थियो । पण्डितका दाजु कुमार पण्डितसमेत घटनास्थलमा पुगेका थिए । 

पण्डित बेपत्ता भएदेखि नै उनको बुबा गुल्ममै रहँदै आएका छन् । घटनाबारे आवश्यक अनुसन्धान भइरहेको प्रहरीले जनाएको छ ।