मन्त्री बन्ने मुड बनाएर रञ्जीताले भेटिन प्रधानमन्त्री

१० चैत, धनगढी । मन्त्री बन्ने मनसाय राखेर नागरिक उन्मुक्ति पार्टी (नाउपा)का अध्यक्ष रञ्जिता श्रेष्ठले प्रधानमन्त्री पुष्पकमल दाहाल 'प्रचण्ड'सँग भेट गरेकी छन् । शनिबार उनले प्रधानमन्त्रीलाई भेटेर सरकारमा जाने संकेत गरेकी हुन् । भेटवार्ताको क्रममा प्रधानमन्त्री प्रचण्डले नाउपालाई एक मन्त्रालय दिने गरी सरकारमा सहभागी हुन आग्रह गरेका छन् । 

छलफलमा सहभागी नाउपाका संस्थापक नेता एवं टीकापुरका मेयर रामलाल डंगौराले भेटवार्ता सकारात्मक भएको बताए । फागुन २१ पछि बनेको नयाँ राजनीतिक समीकरणअनुसार अघि बढ्नेबारे सकारात्मक छलफल भएको डंगौराले जानकारी दिए ।

नयाँ समीकरणमा बनेको केन्द्र सरकारमा सहभागी हुने, सुदूरपश्चिम प्रदेश सरकार र लुम्बिनी प्रदेश सरकार बनाउन टीम बनाउने लगायतका विषयमा छलफल भएको मेयर डंगौराले बताए । यद्यपि सुदूरपश्चिम सरकारलाई दिएको समर्थन फिर्ता लिने वा नलिने विषयमा पार्टीमा अझै छलफल गर्न बाँकी रहेको मेयर डंगौराले बताए ।

सुदूरपश्चिमका लागि भने नागरिक उन्मुक्तिका बहुमत प्रदेश सभा सदस्यहरूले कमल बहादुर शाह नेतृत्वको सरकारलाई समर्थन गर्ने निर्णय सार्वजनिक गरिसकेका छन् । सुदूरपश्चिमका मुख्यमन्त्री शाह अहिले अल्पमतमा छन् । उनले चैतको २३ गतेभित्र विश्वासको मत लिइसक्नुपर्छ । उनीसँग आफ्नो पार्टी (नेपाली काँग्रेस) का १८ र उन्मुक्तिका ७ जना र स्वतन्त्र १  जना गरी २६ जनाको मात्रै समर्थन छ । बहुमतका लागि उनलाई १ जना प्रदेश सभा सदस्यको कमी भएको छ । 

नागरिक उन्मुक्ति पार्टी भित्र देखिएको विवादका कारण पनि मुख्यमन्त्री शाह, उसका पूरै ७ जना प्रदेश सभा सदस्यले विश्वासको मत दिनेमा ढुक्क छैनन् । नागरिक उन्मुक्तिबाट भूमि व्यवस्था कृषि तथा सहकारी राज्यमन्त्री बनाएका कैलाश चौधरीलाई हटाएर उनको ठाउँमा ईन्द्रा गिरिलाई राज्यमन्त्री बनाएपछि उनी रुष्ट छन् ।