गरिमा विकास बैंकको सीईओमा माधव आचार्य नियुक्त, चार वर्षे कार्यकाल

१५ चैत, काठमाडौं । गरिमा विकास बैंक लिमिटेडको प्रमुख कार्यकारी अधिकृत (सीईओ) मा युवा बैंकर माधवप्रसाद उपाध्याय (आचार्य) नियुक्त भएका छन् । बैंकको यही चैत्र १४ गते बुधवार बसेको सञ्चालक समितिको ३०४ औं बैठकले सोही विकास बैंकमा नायव प्रमुख कार्यकारी अधिकृत (डेपुटी सीईओ) पदमा कार्यरत उपाध्यायलाई आगामी २०८१ वैशाख १ गतेदेखि लागू हुने गरी चार वर्षका लागि सीईओमा नियुक्त गरेको हो ।

व्यवस्थापनमा स्नातकोत्तर नवनियुक्त सीईओ उपाध्यायले गरिमा विकास बैंकमा स्थापनाकालदेखि कार्यरत रहनुका साथै विगत १५ वर्षदेखि कम्पनी सचिवको रुपमा र विगत ११ वर्षदेखि नायव प्रमुख कार्यकारी अधिकृत पदमा कार्यरत थिए । उनी बैंकिङ्ग क्षेत्रमा प्रवेश गर्नु पूर्व करिब डेढ दशक अध्यापन-प्राध्यापन पेशामा संलग्न थिए ।

सो विकास बैंकमा विगत १५ वर्षदेखि निरन्तर प्रमुख कार्यकारी अधिकृतको जिम्मेवारी सम्हाल्दै आएका गोविन्द प्रसाद ढकालको कार्यकाल २०८० चैत्र मसान्तमा समाप्त हुने भएसँगै वैशाख १ गतेदेखि रिक्त हुने सीईओ पदमा उपाध्यायलाई सञ्चालक समितिले नियुक्त गर्ने निर्णय गरेको हो । 

साथै, सोही बैठकले विकास बैंकमा कार्यरत सहायक प्रमुख कार्यकारी अधिकृत एवं चार्टर्ड एकाउन्टेन्ट अनिल रेग्मीलाई आज चैत्र १५ गतेदेखि लागू हुने गरी विकास बैंकको कम्पनी सचिवमा नियुक्त गर्ने निर्णय समेत गरेको छ ।

काठमाडौंको लाजिम्पाटमा केन्द्रीय कार्यालय रहेको गरिमा विकास बैंक लिमिटेडले काठमाडौं उपत्यकाभित्र २२ सहित देशभर १२३ शाखा कार्यालय, १ एक्स्टेन्सन काउण्टर र ५१ वट एटीएम मार्फत ग्राहकहरुलाई सेवा प्रदान गर्दै आइरहेको छ ।