रञ्जिताको इच्छाविपरित सुदूरपश्चिममा नाउपाका ५ मन्त्री

१५ चैत, धनगढी । नागरिक उन्मुक्ति पार्टीका अध्यक्ष रञ्जिता श्रेष्ठ चौधरी र संस्थापक केन्द्रीय समितिको निर्णय विपरीत सुदूरपश्चिम सरकारमा नाउपाका पाँच जना मन्त्री भएका छन् । सुदूरपश्चिमका मुख्यमन्त्री कमलबहादुर शाहले नाउपाका  लक्ष्मणकिशोर चौधरीलाई सामाजिक विकास मन्त्रालयको जिम्मेवारी दिएका छन् ।

यसअघि विना विभागीय मन्त्रीको शपथ लिएका चौधरीलाई बिहीबार जिम्मेवारी दिएपछि उनले पदभार ग्रहण गरेका छन् । नाउपाको संस्थापक केन्द्रीय समितिको बैठकले सुदुरपश्चिममा पनि एमाले–माओवादीसहितको सत्ता गठबन्धनलाई समर्थन गर्ने निर्णय गरेको भोलिपल्ट मुख्यमन्त्री शाहले नाउपाका मन्त्रीको जिम्मेवारी तोकेका हुन् ।

मुख्यमन्त्री शाहले बुधबार राति सरकारमा सहभागी नाउपाका मन्त्रीहरूसँग छलफल गरी विना विभागीय मन्त्रीलाई जिम्मेवारी दिने तयारी गरेका थिए । हाल सुदूरपश्चिम प्रदेश सरकारमा नाउपाका ५ जना मन्त्री छन् । मुख्यमन्त्री शाहले यसअघि नाउपा दलका नेता घनश्याम चौधरीलाई आर्थिक मामिला र इन्दिरा गिरीलाई कृषि राज्यमन्त्रीको जिम्मेवारी दिएका थिए भने रामेश्वर चौधरी यस अघिदेखि नै भूमि व्यवस्था कृषि तथा सहकारी मन्त्रीको जिम्मेवारीमा छन् ।