देशमा अर्को उथलपुथल हुनेवाला छः प्रधानमन्त्री प्रचण्ड

१५ चैत, काठमाडौं । प्रधानमन्त्री पुष्पकमल दाहाल 'प्रचण्ड'ले देशमा अर्को राजनीतिक उथलपुथल आउन सक्ने संकेत गरेका छन् । आफूले अथक प्रयास गर्दा पनि असफल बनाउने दिशातिर सबै संयन्त्रहरु लागेको भन्दै उनले अर्को उथलपुथल आउन सक्ने बताएका छन् । उनले यो सत्ता समीकरणबाट पनि सन्तुष्ट हुन नसकेको तर्फ संकेत गरेका हुन् । 

बिहीबार राष्ट्रिय विकास समस्या समाधान समितिको बैठकलाई सम्बोधन गर्दै नयाँ समीकरण बनेपछि पनि काम गर्न नसके पद ओगटेर बस्ने मनस्थितिमा आफू नरहेको प्रधानमन्त्री प्रचण्डले बताए । सुशासन र विकासको काम अझै अगाडि बढाउन नसकेको भन्दै आफूले अर्को उथलपुथल गर्न सक्ने परिस्थिति बलियो बन्दै गएको बताए ।

सुशासन कायम गरेर विकासलाई गति दिने काम हुन नसकेको उनले बताए । अहिले समीकरण चेन्ज भएको छ, साँच्चै भन्छु, कुनै पनि काम अगाडि बढ्न सकेन भने मैले अर्को उथलपुथल गर्न बेर लाग्दैन । मैले कामै गर्न नसक्ने स्थिति भयो भने पद ओगटेर बसिराख्न जरुरी हुँदैन । मैले जनतालाई पनि भनेको छु । अहिले पनि पदको सुरक्षाको लागि समीकरण अर्को बनाएको पनि होइन । पद त मेरो पहिले सुरक्षित थियो, उनले भने । 

उनले कर्मचारी संयन्त्रमा खोट रहेको बताए । अनुगमन तथा मूल्याङ्कनलाई थप वस्तुनिष्ठ, प्रभावकारी, नतिजामूलक बनाउन नसकिएको उनको भनाइ छ । प्रधानमन्त्रीले राष्ट्रिय गौरव तथा रूपान्तरणकारी आयोजना र पहिलो प्राथमिकता प्राप्त ठूला आयोजनाको निर्धारित लागत र समयसीमा भित्रै सम्पन्न गर्नुपर्ने आवश्यकता रहेको भन्दै त्यसअनुसार गर्न निर्देशन दिए ।