लागुऔषध कोकिनको कारोबारमा संलग्न दुईजना पक्राउ

१६ चैत, काठमाडौं । लागुऔषध नियन्त्रण ब्यूरोको टोलीले लागुऔषध कोकिनको कारोबारमा संलग्न अन्तर्राष्ट्रिय गिरोहका दुईजना ब्राजिलियन नागरिकलाई पक्राउ गरेको छ । 

पक्राउ पर्नेमा ब्राजिलियन नागरिक लारिसन ब्रिटोदोस सान्तोस र फर्नान्डा भालदोस सान्तोस रहेका लागुऔषध नियन्त्रण ब्यूरोका प्रवक्ता एवं प्रहरी उपरीक्षक रामेश्वर कार्कीले राससलाई जानकारी दिए । उनले भने, “पक्राउ परेकाहरु ब्राजिल, दोहा हुँदै नेपाल प्रवेश गरेका थिए । उनीहरुका साथबाट कूल एक केजी चार सय ५५ ग्राम कोकिन बरामद भएको छ ।” 

विभिन्न मुलुकबाट नेपाल प्रवेश गरी शङ्कास्पद गतिविधि गर्ने विदेशी नागरिकको निगरानी गर्ने क्रममा उनीहरुलाई काठमाडौँबाट पक्राउ गर्न सकिएको प्रवक्ता कार्कीले बताए ।